लुकाईराखेको ९८ बोरा चामल सहित केहि खाद्यान्न बरामद

चितवन / ईलाका प्रहरी कार्यालय गैँडाकोटले घरमा लुकाईराखेको ९८ बोरा चामल सहित सहित केहि खाद्यान्न गएराति बरामद गरेको छ । दुखी गरिवको लागि वितरण गर्ने भन्दै घरमा राखिएको ठुलो परिमाणको खाद्यान्न प्रहरीले बरामद गरेको हो । गैँडाकोट नगरपालिका वडा नं. ४ स्थित सिता कुंवर र रस बहादुर भुजेललको घरबाट ९८ बोरा चामल, ३ बोरा चिउरा, १ बोरा दाल, ३ बोरा सोयाविन बरामद गरिएको ईलाका प्रहरी कार्यालय गैँडाकोटले जनाएको छ ।
नारायणी नदी किनारमा रहेका असाहय र सभ्यताको घर नाम गरेको आश्रममका लागि घरमा राखेको बताएपनि कुंवर र भुजेलले आवश्यक प्रमाण पेश गर्न नसकेकोले प्रहरीले खाद्यान्न जफत गरेको हो । सहयाेगका लागि भन्दै रकम तथा खाद्यान्न उठाएर बेच्ने समेत थाहा पाएकाे सूचनाको आधारमा प्रहरीले छापा मारेको हो ।
जिल्ला प्रशासन कार्यालयको अनुमती विना कुनैपनि संघसंस्था तथा व्यक्तिले आफुखुसी राहत तथा सहयोगका नाममा खाद्यान्न संकलन तथा वितरण गर्न नपाईने नियम छ । संकटको समय बढ्दै गएपछि समाजसेवा र राहातका नाममा जिल्लामा आफुखुसी सहयोग बटुल्ने तथा थोरै सहयोग गरेर धेरै प्रचार गर्नेको जमात बढ्दो क्रममा छ ।