काठमाडौँ / सडकपेटीमा समेत व्यवसाय गर्न नदिएपछि दैनिक सडक आन्दोलन गर्न बाध्य भएका दृष्टिबिहीनहरुले सरकारप्रति आक्रोश व्यक्त गरेका छन् ।
काठमाडौँको माइतीघर मण्डलामा बिहीबार पनि धर्नामा बसेका उनीहरूले शिक्षा, स्वास्थ्य र रोजगारीको अवसर दिएर आफूहरूलाई पनि गाँस, बास र कपासको व्यवस्था सुनिश्चित गर्न सरकारलाई दबाब दिएका हुन् ।
- ADVERTISEMENT -
सरकारले आफूहरूको माग सुनुवाइ नगरेपछि दैनिक सडक आन्दोलन गर्न बाध्य हुनुपरेको दृष्टिविहीन रोजिना अर्यालले बताए । उनले सरकारले सडकमा व्यवसाय गर्दा पनि आफूहरूलाई जब्बरजस्ती धरपकड गरेको भन्दै आपत्ति जनाए ।
अर्यालले भने ‘सरकारले शिक्षा, स्वास्थ्य र रोजगारी सरकारले दिनुपर्यो । हामी यसरी सडकमा आउनुपर्ने बाध्यता भयो । सरकारले चाँडो भन्दा चाँडो हाम्रो कुरा सुनोस् । क्षमता हुँदाहुँदै पनि हामी बाध्यताले यहाँ सडकमा उत्रिनुपरेको छ । हाम्रो पनि सडकमा नै बसेर जीविकोपार्जन गरौँ भन्ने माग त होइन नि । हामीलाई रोजगारी चाहिएको छ । हामीले हाम्रो बालबालिकालाई पनि राम्रो शिक्षादीक्षा दिनु पाउनुपर्दछ । हाम्रो माग सरकारले चाँडो भन्दा चाँडो सुनुवाइ गरोस् । हामी ध्यानाकर्षण गराउन आएका हौँ ।’
सरकारले सडक व्यवसाय गरेर बसिरहेका उनीहरूमाथि धरपकड सुरु गरेपछि विगत ४ दिन यता सडकपेटी केन्द्रित स्वरोजगारमूलक दृष्टिविहीन व्यवसायीहरूको समूह नै माइतीघर मण्डलामा दैनिक बिहान नौ बजेदेखि १२ बजेसम्म ३ घण्टा धर्नामा बस्दै आएका छन् । उनीहरूले आफूहरूलाई गरिखान समेत नदिएको भन्दै सरकारप्रति आक्रोश व्यक्त गर्दै आएका छन् । समूहले सरकारले आफूहरूमाथि अत्याचार गरेको उनीहरूको गुनासो थियो ।
