गैंडाकोटमा चार वटा संस्थाको एक दिने योग तथा प्राकृतिक चिकित्सा प्रशिक्षण कार्यक्रम

गैंडाकोट । गैंडाकोटमा ‘आफ्नो बारे आफैँ जानौ, आफ्नो डाक्टर आफैँ बनौं’ भन्ने मूल नाराका साथ १ दिने योग तथा प्राकृतिक चिकित्सा प्रशिक्षण एवम् परामर्श कार्यक्रम सम्पन्न भएको छ ।
कार्यक्रम जलुके खानेपानी तथा सरसफाइ उपभोक्ता संस्था, गैंडाकोट नगरपालिका वडा नं १ को कार्यालय, मौलाकालिका सामुदायिक वन उपभोक्ता समूह र धार्मिक सेवा समिति मौलाकालिका मन्दिरको संयुक्त आयोजनामा सम्पन्न भएको हो ।
गैंडाकोट नगरपालिका वडा नं. १ का वडाध्यक्ष हरिप्रसाद सापकोटा कार्यक्रमका प्रमुख अतिथि रहेका थिए । प्रमुख अतिथि सापकोटाले कोभिड–१९ ले विश्व नै आक्रान्त भइरहेको बेला तेस्रो भेरियन्ट फैलिरहेकोले सबैलाई स्वास्थ्य सम्बन्धी मापदण्ड अपनाउन आग्रह गरे ।
उनले पछिल्लो समय योग तथा प्राकृतिक चिकित्साको महत्व बढ्दै बताए । खानपान, आचरण र नियमित योग गरेमा स्वस्थ रहन सकिने उनको भनाइ थियो ।
वर्तमान परिप्रेक्ष्यमा सबैले योगतर्फ ध्यान दिन सकिए रोग प्रतिरोधात्मक क्षमताको विकासमा सहयोग पुग्ने उनको धारणा थियो । उनले प्रकृतितर्फ फर्कनु पर्ने र प्रकृतिमैत्री वातावरण सिर्जना गर्नुपर्नेमा जोड दिन आग्रह गरे ।
कार्यक्रममा वडा सदस्यहरु सुरेश रेग्मी, राजेन्द्र उपाध्याय, सीता सापकोटा, प्रकाश सापकोटा लगायतको उपस्थिति रहेको थियो ।
जलुके खानेपानी तथा सरसफाइ उपभोक्ता समूहका अध्यक्ष मोतिचन्द्र चालिसेको सभापतित्वमा सम्पन्न भएको थियो । कार्यक्रम कमल कंडेलले संचालन गरेका थिए ।