चितवन / क्याम्पाचौरमा जारी इसुजु चितवन गोल्डकपको सेमिफाइनलमा सशस्त्र प्रहरी बल (एपिएफ) एफसी प्रवेश गरेको छ । केबिए ग्लोबल भरतपुर फुटबल क्लब (बिएफसी) विरुद्ध रोमाञ्चक जित हात पार्दै एपीएफ बुधबार सेमिफाइनलमा प्रवेश गरेको हो । एपिएफले बिएफसीलाई ३–२ गोलअन्तरले पराजित गरेको हो ।
एपिएफको जितमा हरि कार्कीले दुई गोल गरे । एपिएफले अर्को एक उपहार गोल पायो । बिएफसीका कमल थापा र राज भुसालले गोल गरे । खेलको १० औं मिनेटमा हरिको गोलबाट एपिएफले अग्रता लियो ।
- ADVERTISEMENT -
एक गोलले पछि परेको बिएफसीले पहिलो हाफको अतिरिक्त समयमा कमब्याक ग¥यो । पहिलो हाफको अतिरिक्त समयको पहिलो मिनेटमा कमलले बराबरी गोल फर्काए । लगत्तै अतिरिक्त समयको तेस्रो मिनेटमा राजले गोल गर्दै ए डिभिजन क्लबविरुद्ध बिएफसीलाई अग्रता दिलाए ।
बिएफसीको कमब्याकपछि खेल निकै रोमाञ्चक बन्यो । दोस्रो हाफमा दुबै टिमले गोलको अवसर सृजना गर्ने प्रयास गरे । ४९ औं मिनेटमा एपिएफ बराबरी गोल फर्काउन सफल भयो । उसका लागि हरि कार्कीले गोल गरे ।
- ADVERTISEMENT -
६९ औं मिनेटमा एपिएफ भाग्यमानी साबित भयो । बिएफसीका कुलदीप कार्कीले आत्माघाती गोल गरे । बल क्लियर गर्न खोज्दा उनले आफ्नै पोष्टमा गोल गरेपछि एपिएफ ३–२ ले विजयी भयो । एपिएफका हरि म्यान अफ दि म्याच चुनिए । उनले दश हजार रुपैयाँ प्राप्त गरे । यो जितसँगै सेमिफाइनलमा स्थान बनाएको एपिएफले फाइनल प्रवेशका लागि मनाङ एफसीको सामना गर्नेछ ।
मनाङ बागमती नगरपालिका सर्लाहीलाई पराजित गर्दै सेमिफाइनलमा प्रवेश गरिसकेको छ । आज बिहीबार अन्तिम क्वाटरफाइनल खेल हुनेछ ।
अन्तिम क्वाटरफाइनल खेलमा दिउँसो ४ बजे त्रिभुवन आर्मी फुटबल क्लब र नव जनजागृती युवा क्लब भिड्नेछन् । असोज ३ गतेसम्म चल्ने गोल्डकप विजेताले सात लाख तथा उपविजेताले तीन लाख ५० हजार रुपैयाँ प्राप्त गर्नेछ ।
