चितवन गार्डेन रिसोर्टलाई तीन लाख जरिवाना, म्याद सकिएको अखाद्य वस्तुको प्रयोग

चितवन / चितवन गार्डेन रिसोर्टलाई तीन लाख रुपैयाँ जरिवाना हुने भएको छ । जिल्ला प्रशासन कार्यालय चितवनका सहायक प्रमुख जिल्ला अधिकारी चिरञ्जीवी शर्माको नेतृत्वमा अनुगमन समितिले तयार पारेको प्रतिवेदनमा रिसोर्टलाई तीन लाख रुपैयाँ जरिवाना गर्न सिफारिस गरिने भएको हो ।
प्रतिवेदनमा उपभोक्ता संरक्षण ऐन २०७५ को दफा १६ (२) क अनुसार होटलले अनचित व्यापारिक तथा व्यवसाय जन्य क्रियाकलाप गरी गुणस्तरहिन खाद्य बस्तु उत्पादन गरी सेवा प्रवाह गरेकोले सोही ऐनको दफा ३९ (१) ख अनुसार तीन लाख रुपैयाँ जरिवानाको सिफारिस गरिएको उल्लेख छ ।
बिरामीको स्वास्थ्य परीक्षण गर्दा खानामा दिशामा पाइने व्याक्टेरिया पाइएको प्रतिवेदनमा उल्लेख छ । होटल उपभोग्य मिति सकिएको अखाद्य बस्तु भेटिएको, ढोका तथा झ्यालमा जाली नभएको, भान्सामा झिँगा पाइएको, कामदारको सरसफाइ सन्तोषजनक नभएको, भान्सा र भाँडा माझ्ने ठाउँसँगै भएको, होटलको अनिवार्य अभिलेख नभएको पनि प्रतिवेदनमा उल्लेख छ ।
उक्त प्रतिवेदन ३ गते आइतबार प्रमुख जिल्ला अधिकारी अस्मान तामाङलाई पेश गर्ने सहायक प्रजिअ शर्माले बताए ।