काठमाडौं / राष्ट्रिय प्रजातन्त्र पार्टी (राप्रपा)का महामन्त्री डा. धवलशमशेर राणालाई रिहा गर्ने तयारी अन्तिम चरणमा पुगेको छ । जिल्ला प्रहरी परिसर, काठमाडौंले राणाकी पत्नी प्रतिमा राणालाई (आज) शनिबार बिहान प्रहरी परिसरमा उपस्थित हुन भनेको हो ।
राप्रपाका नेता ऋषिराज देवकोटाले पत्नी प्रतिमा राणालाई प्रहरीले बोलाएको पुष्टि गर्दै आफूहरू पनि प्रहरी परिसर जाने तयारीमा रहेको जानकारी दिए । यसअघि शुक्रबार नै राणालाई रिहा गर्ने योजना थियो, तर आवश्यक कानुनी प्रक्रिया ढिला भएकाले रिहा प्रक्रिया स्थगित गरिएको प्रहरीले जनाएको छ । राणा रिहा हुने खबर बाहिरिएपछि शुक्रबार राप्रपाका नेता तथा कार्यकर्ताहरूको भीड प्रहरी परिसरमा लागेको थियो ।
- ADVERTISEMENT -
प्रहरी परिसर काठमाडौंको सिफारिसमा सरकारी वकिलको कार्यालयले राणालाई हाजिर जमानीमा रिहा गर्ने तयारी गरेको छ । क्यान्सरका बिरामी रहेका राणालाई नियमित उपचार तथा फलोअपका लागि भारत जानुपर्ने भएकाले उनलाई अस्थायी रूपमा हाजिर जमानीमा छोड्ने निर्णय भएको हो । उनका अनुसार राणाको बयान प्रक्रिया पूरा भइसकेको छ र अब मुद्दा अघि बढाइनेछ ।
गएको चैत १५ गते काठमाडौँको तीनकुनेमा राजावादी समूहले आयोजना गरेको प्रदर्शन हिंसात्मक भएपछि राणा त्यसै दिन पक्राउ परेका थिए । उनलाई स्वास्थ्य उपचारबाट वञ्चित गरिने प्रयास भइरहेको भन्दै शुक्रबार मात्रै राजसंस्था पुनर्स्थापनाका पक्षधर संयुक्त जनआन्दोलन समितिले कडा आपत्ति जनाइसकेको थियो ।
