रामेछाप / रामेछाप जिल्लाको मन्थली नगरपालिका–१२, गेलु सिक्रालमा शुक्रबार साँझ ससुराले आफ्नै बुहारीको खुकुरी प्रहार गरी बीभत्स हत्या गरेका छन् । ६१ वर्षीय शम्भु बुढाथोकीले अन्दाजी २८ वर्षीया बुहारी पवित्रा बुढाथोकीको ज्यान लिएका हुन् ।
पवित्रा आफ्नो छोरालाई लिन ससुराली घर आएको बेला यो दुःखद् घटना भएको हो । ससुरा शम्भु बुढाथोकीले बुहारीमाथि धारिलो खुकुरीले निर्मम प्रहार गरेका थिए, जसका कारण पवित्राको घटनास्थलमै मृत्यु भएको बताइएको छ । बुहारीको हत्या गरेलगत्तै आरोपी ससुरा शम्भुले नजिकैको खिम्ती प्रहरी चौकीमा आफैं पुगेर आत्मसमर्पण गरेका छन् ।
- ADVERTISEMENT -
मृतक पवित्राका श्रीमान् खम्बबहादुर बुढाथोकीले गत साउन महिनामा आत्महत्या गरेका थिए । खम्बबहादुरको आत्महत्यापछि ससुरा शम्भुले बुहारी पवित्राकै कारण छोराले ज्यान फालेको भन्दै निरन्तर आरोप लगाउँदै आएका थिए । सोही रिसइबी र मानसिक तनावका कारण यो जघन्य अपराध भएको हुन सक्ने प्रारम्भिक अनुमान गरिएको छ ।
पवित्राका ९ वर्षीय छोरा घटनाको समयमा हजुरबुबा–हजुरआमा (शम्भु)सँगै बस्दै आएका थिए । आत्मसमर्पण गरेका बुढाथोकीलाई हिरासतमा राखी घटनाबारे थप अनुसन्धान अघि बढाइएको जिल्ला प्रहरी कार्यालय रामेछापले जनाएको छ ।
