काठमाडौं / चीनबाट उर्लिएर आएको बाढीले रसुवामा वितण्डा मच्चाउँदै धादिङको त्रिशूली नदीमा पनि अकल्पनीय घटनाहरू घटाएको छ । मंगलबार नदी किनारका फरक–फरक स्थानमा दुई जनाको शव फेला परेको छ भने अर्को एक स्थानमा अन्त्येष्टि गरिँदै गरेको चिता नै बाढीले बगाएको छ ।
जिल्ला प्रहरी कार्यालय धादिङका अनुसार गल्छी गाउँपालिका–२, क्यरेनीटार र गजुरी गाउँपालिका–६, बेल्खुस्थित त्रिशूली नदी किनारमा दुई पुरुषको शव फेला परेको हो । जिल्ला प्रहरी कार्यालयका डीएसपी सुवास हमालले दुवै शवको प्रकृति हेर्दा हालसालै मृत्यु भएको अनुमान गरिएको र उनीहरुको पहिचान खुलाउने प्रयास भइरहेको जानकारी दिए । प्रहरीले उनीहरुको मृत्यु पनि यही बाढीमा परेर भएको हुनसक्ने आशंका गरेको छ । ‘घटनाको गम्भीरतापूर्वक अनुसन्धान गर्न प्रहरी टोली घटनास्थलमा खटिएको छ,’ डीएसपी हमालले भने ।
- ADVERTISEMENT -
यस्तै, धादिङकै बेनिघाट रोराङ गाउँपालिका–७, चरौंदीमा अर्को दुःखद घटना घटेको छ । गाउँपालिका अध्यक्ष कृष्णबहादुर थपलिया ‘विवेक’का एक आफन्तको अन्त्येष्टिका लागि त्रिशूली किनारमा चिता बनाइएको थियो । बिहान करिब साढे ९ बजेतिर दाहसंस्कार चलिरहेकै बेला नदीमा अचानक बाढीको बहाव उर्लिएपछि जलिरहेको शवको अवशेषसहित चितालाई नै बगाएको हो ।
नदी किनारमा जोखिम हुनसक्नेबारे पालिकाभरि पूर्वसूचना जारी गरेको भएपनि बाढीको वेगले हेर्दाहेर्दै चिता बगाएको उनको भनाई छ । वडा नम्बर ७ का अध्यक्ष कुमार बस्नेतले चिता बगाएको दृश्यको भिडियो खिचेर सामाजिक सञ्जालमा सार्वजनिक गरेपछि घटना थप चर्चामा आएको छ ।
- ADVERTISEMENT -
