काठमाडौं । सिरहाको गोलबजारमा आफ्नै भाइ र बुहारीबीचको सामान्य घरेलु झगडा छुटाउन खोज्दा दाइको हत्या भएको छ ।
गोलबजार नगरपालिका-३ निवासी २५ वर्षीय श्याम सदा र उनकी श्रीमती कौशल्या सदाबीच बिहीबार राति करिब ९ बजे घरायसी विषयमा विवाद चर्किएको थियो ।
- ADVERTISEMENT -
उनीहरुको झगडा बढ्दै गएपछि त्यसलाई साम्य पार्न भन्दै श्यामका दाइ, ३५ वर्षीय मोतीराम सदा त्यहाँ पुगेका थिए । विवाद मिलाउन प्रयास गरिरहेका मोतीराममाथि भाइ श्यामले अचानक खुकुरी प्रहार गरे ।
खुकुरीको गहिरो चोट लागेर गम्भीर घाइते भएका मोतीरामलाई तत्कालै उपचारका लागि प्रादेशिक अस्पताल लहान लगिएको थियो । तर, उपचारकै क्रममा राति करिब सवा ११ बजे उनको मृत्यु भएको हो ।
आफ्नै दाइको हत्या गरेपछि फरार भएका श्याम सदालाई औरही गाउँपालिकास्थित नेपाल-भारत सीमा क्षेत्रबाट पक्राउ गरिएको सिरहाका प्रहरी प्रवक्ता, प्रहरी नायब उपरीक्षक (डिएसपी) विरेन्द्रकुमार पासवानले जाकारी दिए ।
पक्राउ परेका श्याम सदालाई जिल्ला प्रहरी कार्यालय सिरहामा राखी घटनाबारे थप अनुसन्धान भइरहेको प्रहरीले जनाएको छ ।
