काठमाडौं / राष्ट्रिय स्वतन्त्र पार्टी रास्वपा सभापति रवि लामिछानेलाई थुनामै पठाउने आदेश जारी भएको छ ।
जिल्ला अदालत रुपन्देहीका न्यायाधीश नारायणप्रसाद सापकोटाको इजलासले लामिछानेलाई थुनामै पठाउने आदेश दिएको हो ।
- ADVERTISEMENT -
सहकारी ठगी र संगठित अपराधसम्बन्धी मुद्दामा थुनामा रहेका लामिछानेले रिहा गर्न माग गर्दै निवेदन दिएका थिए । उनले साउन १९ गते बैंक ग्यारेन्टीमार्फत रिहाइको माग गर्दै अदालतमा निवेदन दिएका थिए ।
उनले जिल्ला अदालतमा सहकारी ऐनको दफा १३१(क) अनुसार बिगो तिरेर साधारण तारेखमा रिहा गरिदिन आग्रह गरेका थिए ।
तर सोमबार भएको सुनुवाइपछि अदालतले उनको माग अस्वीकार गर्दै थुनामै पठाउने फैसला सुनाएको हो ।
निवेदनमा उनले कानुनी रूपमा उक्त दफा आफ्नो हकमा नपर्ने भए पनि बिगो स्वरूप दुई करोड ८४ लाख रुपैयाँको बैंक ग्यारेन्टी पेस गरिसकेको उल्लेख गरेका थिए । तर, अदालतले माग गरे बमोजिम नहुने फैसला सुनायो ।
अब उनीविरुद्ध मुद्दाको पुर्पक्षमा थुनैबाट प्रक्रिया अगाडि बढ्नेछ । अदालतको आदेशसँगै लामिछाने पक्षको रिहाइको प्रयास तत्कालका लागि असफल भएको छ ।
लामिछाने गत वर्ष चैत २२ गतेदेखि पुर्पक्षका लागि थुनामा छन् ।
