भरतपुर / जिल्ला कारागार कार्यालय चितवनबाट भागेका कैदीबन्दीमध्ये अझै १४३ जना फर्किएका छैनन् । कारागार कार्यालयले असोज २० गतेसम्म कारागार नफर्किए कारबाही हुने भन्दै सूचना जारी गरे पनि हालसम्म उनीहरू नफर्किएको कार्यालयले जनाएको छ ।
कार्यालयका प्रमुख रवीन्द्रप्रसाद ढुङ्गानाका अनुसार फरार हुनेहरूमध्ये सबैभन्दा बढी लागूऔषध, जबरजस्ती करणी, गैँडा मारी खाग बिक्री व्यवसाय, कर्तव्य ज्यान, सरकारी ठगी र विभिन्न सङ्गठित अपराधका अभियुक्तहरू छन् ।
- ADVERTISEMENT -
फरारमध्ये ११ जना भारतीय नागरिक पनि रहेका छन् । उनीहरू पनि अधिकांश लागूऔषध कारोबार र जबर्जस्ती करणीजस्ता गम्भीर आपराधिक मुद्दामा दोषी ठहर भई सजाय काटिरहेका थिए ।
यस्तै, कारागार कार्यालय चितवनमा पनि विभिन्न जिल्लाबाट भागेका १३ जना कैदीबन्दी आएका छन् भने यहाँबाट भागेका ९ कैदीबन्दीहरु अन्य जिल्लामा रहेका कार्यालय प्रमुख ढुङ्गानाले बताए । कारागारले तोकेको समयसम्म सम्पर्कमा नआएकालाई अब कारागार ऐन र प्रचलित कानुनअनुसार कारबाही गरिने उनले बताए । फरार कैदीबन्दी–हरूको खोजीका लागि प्रहरीको विशेष टोली परिचालन गरिएको छ र समयमा फर्किन अनुरोध पनि गरेको छ ।
कार्यालयका प्रमुख रवीन्द्रप्रसाद ढुङ्गानाले तोकिएको समयभित्र ५९९ जना कैदीबन्दी फर्किएका छन् । जसमध्ये दुई जना नाबालक पनि फर्किएका छन् । भागेका कैदीबन्दीमध्ये केहीको परिवारसँग सम्पर्क हुन सकेको र अरुको हकमा परिवारसँग सम्पर्क भए पनि नफर्किएको उनले बताए ।
‘जेनजी’ आन्दोलनका क्रममा भदौ २५ गते यस कारागारबाट ७४२ जना कैदीबन्दी भागेका थिए । उनीहरूलाई पटक–पटक सूचना जारी गरी सम्पर्कमा आउन भनिएको थियो । यहाँबाट भागेका आठ जना कैदीबन्दीमध्ये चारजना भैरहवा कारागार, धादिङ, सुर्खेत, बागलुङ र नुवाकोट कारागारमा एक÷एकजना पुगेका छन् ।
कारागारले तोकेको समयसम्म सम्पर्कमा नआएकालाई अब कारागार ऐन र प्रचलित कानुनअनुसार कारबाही गरिने उनले बताए । यस्तै, फरार रहेका कैदीबन्दीलाई लुकाउने, आश्रय दिने गरेको पाइएमा आश्रय दिने व्यक्तिलाई समेत कसूरदार ठानी कारबाही गरिने जनाइएको छ ।
