काठमाडौं / देशभर पश्चिमी वायु र अरब सागरमा विकसित न्यून चापीय प्रणालीको दोहोरो प्रभावका कारण मौसममा उल्लेख्य परिवर्तन आएको छ । बंगालको खाडीबाट आएको ‘मोन्था’ चक्रवात भने नेपालको आकाशबाट बाहिरिएसँगै यसको प्रत्यक्ष असर अब नरहेको जल तथा मौसम विज्ञान महाशाखाले जनाएको छ ।
आइतबार बिहानैदेखि देशका अधिकांश भू–भागमा आंशिकदेखि साधारणतया बदली छाएको छ । विशेषगरी कोशी, मधेश, बागमती र गण्डकी प्रदेशका केही स्थानमा छिटपुटदेखि हल्का वर्षा रेकर्ड गरिएको छ ।
- ADVERTISEMENT -
महाशाखाका अनुसार दिउँसो कोशी प्रदेश, बागमती प्रदेश र गण्डकी प्रदेशमा साधारणतया बदली रहनेछ । मधेश प्रदेशसहित बाँकी प्रदेशका पहाडी भू(भागमा आंशिक बदलीको सम्भावना रहेको छ भने अन्य स्थानमा मौसम मुख्यतया सफा रहनेछ ।
यस अवधिमा कोशी, बागमती र गण्डकी प्रदेशका पहाडी भेगका थोरै स्थानमा हल्का वर्षा वा हिमपातको सम्भावना रहेको छ । यात्रा गर्नेहरूलाई विशेष सावधानी अपनाउन आग्रह गरिएको छ ।
आइतबार राति पनि कोशी, बागमती र गण्डकी प्रदेशका पहाडी भू–भागमा आंशिक बदली कायम रहनेछ । देशका बाँकी भू–भागमा भने मौसम मुख्यतया सफा रहने पूर्वानुमान गरिएको छ ।
महाशाखाले रातिको समयमा कोशी, बागमती र गण्डकी प्रदेशका पहाडी तथा हिमाली भू–भागका एक–दुई स्थानमा हल्का वर्षा र हिमपातको सम्भावना रहेको जनाएको छ । यसले गर्दा तापक्रममा थप गिरावट आउने र चिसो बढ्ने देखिन्छ ।
पश्चिमी वायु र न्यून चापीय प्रणालीको प्रभावले केही दिनसम्म मौसम प्रभावित हुने भएकाले चिसोबाट बच्न आवश्यक तयारी गर्न तथा यात्रा गर्दा सावधानी अपनाउन मौसमविद्हरूले सुझाव दिएका छन् । विशेषगरी उच्च हिमाली र पहाडी भेगमा हिमपातका कारण जनजीवन प्रभावित हुन सक्ने भएकाले सतर्क रहन आग्रह गरिएको छ ।
