काठमाडौं / प्रतिनिधिसभाको समानुपातिक निर्वाचन प्रणालीतर्फको मतगणना अन्तिम चरणमा पुग्दा राष्ट्रिय स्वतन्त्र पार्टी (रास्वपा) ले भारी मतका साथ आफ्नो बर्चस्व कायम गरेको छ । निर्वाचन आयोगको पछिल्लो विवरण अनुसार कुल एक करोड दुई लाख ६८ हजार ९९६ मतगणना भइसक्दा रास्वपाले करिब ५० लाखको हाराहारीमा मत प्राप्त गरेको छ ।
आयोगले सार्वजनिक गरेको पछिल्लो तथ्याङ्कअनुसार रवि लामिछाने नेतृत्वको रास्वपाले हालसम्म ४९ लाख ३७ हजार ६५२ मत प्राप्त गर्दै पहिलो स्थान सुरक्षित गरेको छ । यो कुल सदर मतको ठूलो हिस्सा हो, जसले समानुपातिक सिट संख्यामा उक्त पार्टीको बलियो उपस्थितिलाई सुनिश्चित गरेको छ । रास्वपालाई पछ्याइरहेको नेपाली कांग्रेसले १६ लाख ६९ हजार ८७६ मत प्राप्त गरेको छ भने तेस्रो स्थानमा रहेको नेकपा (एमाले) को पोल्टामा १३ लाख ८७ हजार ४७९ मत परेको छ ।
- ADVERTISEMENT -
नेपाल कम्युनिस्ट पार्टी – ७ लाख ५० हजार २४१
श्रम संस्कृति पार्टी – ३ लाख ४६ हजार ८०१
राष्ट्रिय प्रजातन्त्र पार्टी (राप्रपा) – ३ लाख २२ हजार ०९७
जनता समाजवादी पार्टी, नेपाल – १ लाख ६९ हजार ४०३
राष्ट्रिय परिवर्तन पार्टी – १ लाख ६४ हजार ७३३
जनमत पार्टी – ७५ हजार ४४५
थ्रेसहोल्ड र सिटको सम्भावना
हालसम्मको नतिजा अनुसार रास्वपा, कांग्रेस, एमाले, नेकपा, श्रम संस्कृति र राप्रपाले तीन प्रतिशतको राष्ट्रिय थ्रेसहोल्ड कटाइसकेका छन् । समानुपातिकतर्फको अन्तिम नतिजा आएपछि मात्र कुन दलले कति सिट पाउने भन्ने स्पष्ट खाका तयार हुनेछ ।
- ADVERTISEMENT -
प्रत्यक्षतर्फका १६५ वटै निर्वाचन क्षेत्रको नतिजा यसअघि नै सार्वजनिक भइसकेको छ। प्रत्यक्षतर्फको नतिजामा पनि रास्वपाले ऐतिहासिक सफलता हासिल गर्दै १२५ सिट जितेको छ । त्यसैगरी नेपाली कांग्रेसले १८, एमालेले ९, नेकपाले ८, श्रम संस्कृति पार्टीले ३ र राष्ट्रिय प्रजातन्त्र पार्टीले १ सिटमा जीत निकाल्न सफल भएका छन् ।
