काठमाडौं / देशका विभिन्न भागमा सक्रिय मौसमी प्रणालीका कारण आज (मंगलबार) देशका धेरैजसो स्थानमा मौसम आंशिकदेखि सामान्य बदली रहने देखिएको छ । मौसम पूर्वानुमान महाशाखाका अनुसार पश्चिमी वायु, स्थानीय वायु र कोशी प्रदेशमा मनसुनी वायुले प्रभाव बढेको छ ।
महाशाखाले दिएको पछिल्लो विवरणअनुसार कोशी, गण्डकी, लुम्बिनी र कर्णाली प्रदेशका पहाडी भूभागहरूमा बादल छाएको छ भने अन्य क्षेत्रमा मौसम प्रायः सफा देखिएको छ। सुदूरपश्चिम र कर्णाली प्रदेशका केही स्थानहरूमा तथा कोशी, गण्डकी र लुम्बिनी प्रदेशका एक–दुई स्थानमा चट्याङसहित हल्का वर्षा भइरहेको छ ।
- ADVERTISEMENT -
आज दिउँसो कोशी, गण्डकी, कर्णाली र सुदूरपश्चिम प्रदेशका पहाडी भूभागका थोरै स्थानहरूमा र बाँकी प्रदेशका एक–दुई स्थानमा मेघगर्जन र चट्याङसहित हल्कादेखि मध्यम वर्षा हुने सम्भावना छ । साथै, कोशी र सुदूरपश्चिम प्रदेशका उच्च पहाडी तथा हिमाली क्षेत्रहरूमा हल्का वर्षासहित हिमपातको सम्भावना पनि रहेको छ ।
आज राति पनि लुम्बिनी प्रदेशसहित पहाडी भूभागमा चट्याङसहित हल्का देखि मध्यम वर्षा हुन सक्ने सम्भावना रहेको मौसमविद्हरूले जनाएका छन् । उच्च पहाडी तथा हिमाली क्षेत्रहरूमा रातिको समयमा पनि हल्का हिमपात हुन सक्ने अनुमान गरिएको छ ।
महाशाखाले सम्भावित चट्याङ, वर्षा र हिमपातका कारण दैनिक जनजीवन, कृषि कार्य, स्वास्थ्य सेवा, यातायात तथा हवाई उडानहरू प्रभावित हुन सक्ने भन्दै आवश्यक सतर्कता अपनाउन आम नागरिकलाई अनुरोध गरेको छ । यात्रा वा बाहिरी गतिविधिमा निस्कनुअघि मौसम अपडेट हेर्न र आवश्यक सतर्कता अपनाउन विज्ञहरूले सुझाव दिएका छन् ।
