काठमाडौं / तीन वर्षीया बालिका गरिमा चौधरीको हत्या प्रकरणमा मुख्य आरोपी भनिएका नाबालकको भिडियो सामाजिक सञ्जालमा सार्वजनिक भएपछि घटनाबारे नयाँ प्रश्न उठेको छ ।
भिडियोमा प्रहरीको उपस्थितिमा नाबालकसँग घटनाबारे सोधपुछ गरिएको देखिन्छ । उनले घटनामा आफ्नो संलग्नता स्वीकार गर्दै प्रदीप खड्का नाम गरेका व्यक्तिको समेत संलग्नता रहेको दाबी गरेका छन् ।
- ADVERTISEMENT -
उच्च प्रहरी स्रोतका अनुसार सामाजिक सञ्जालमा सार्वजनिक भएको भिडियो वास्तविक हो । मेडिकल परीक्षणका क्रममा कलैया अस्पतालमा नाबालकसँग अनौपचारिक रूपमा सोधपुछ गर्दा भिडियो खिचिएको बताइएको छ ।
सोधपुछ गर्ने व्यक्तिको अनुहार भिडियोमा देखिँदैन । स्रोतका अनुसार ती व्यक्ति प्रहरी नभई अस्पतालका स्वास्थ्यकर्मी हुन् । प्रहरीका अनुसार बालकको मानसिक अवस्था बुझ्नका लागि स्वास्थ्यकर्मीले सोधपुछ गरेका थिए । भिडियोमा प्रहरीहरूसमेत देखिन्छन् । एक प्रहरी बन्दुकसहित देखिएका छन् भने सिभिल पोसाकमा रहेका व्यक्तिले मोबाइलबाट भिडियो खिचेको देखिन्छ ।
भिडियोको सुरुवातमा सोफामा बसेका प्रहरीले गर्मी भएको भन्दै एसी चलाउन आग्रह गरेको सुनिन्छ । त्यसक्रममा आरोपी नाबालकले आफूलाई जाडो लागेको भन्दै हाँस्दै जवाफ दिएका छन् । त्यसपछि अनुहार नदेखिएका व्यक्तिले घटनाबारे सबै विवरण बताए खाना खुवाउने आश्वासन दिएको सुनिन्छ । प्रहरीले पनि खाना खुवाउने बताएपछि नाबालकले घटनाबारे बोल्न थालेका छन् ।
सोधपुछका क्रममा नाबालकले आफूलाई प्रदीप खड्का नाम गरेका साथीले घटनाका लागि उक्साएको दाबी गरेका छन् । उनले प्रदीपलाई गाडीमा लिएर आएको र उनकै योजनाअनुसार बालिकालाई चकलेटको प्रलोभन देखाएर एउटा घरमा लगेको बताएका छन् ।
उनका अनुसार घटनास्थलमा अन्य बालबालिका खेलिरहेका थिए र प्रदीप पनि त्यहीँ थिए । चकलेटको प्रलोभन देखाएर बालिकालाई आफूले एउटा घरमा लगेको, तर उक्त घर कसको हो भन्ने आफूलाई थाहा नभएको उनले बताएका छन् ।
नाबालकले बालिकामाथि दुवै जनाले पालैपालो आपराधिक हर्कत गरेको दाबी गरेका छन् । बालिका बेहोस भएपछि प्रदीप त्यहाँबाट भागेको र आफूले बालिकालाई त्यही घरमा रहेको डोरीले बाँधेर तन्नामा बेरेपछि ढोकामा चुकुल लगाएर हिँडेको उनको भनाइ छ ।
भिडियो सार्वजनिक भएपछि प्रहरी प्रधान कार्यालयले समेत घटनामा चासो देखाएको छ । यसअघि प्रहरीले घटनामा प्रदीप खड्काको नाम सार्वजनिक गरेको थिएन । घटनामा पक्राउ परेका दोस्रो व्यक्तिका रूपमा प्रोग्रेस चौधरीको नाम सार्वजनिक भएको छ । नाबालकले खड्काको नाम लिएपछि घटनाको अनुसन्धान थप पेचिलो बनेको छ ।
