३० जना काँग्रेस त्यागेर नेकपामा प्रवेश

मकवानपुर / राक्सिराङ गाउँपालिका वडा नं १ का ३० जना नेपाली काँग्रेस परित्याग गरी नेपाल कम्यूनिष्ट पार्टी (नेकपा) मा प्रवेश गरेका छन् । मंगलबार नेकपाको वडा कमिटिले आयोजना गरेको चियापान तथा शुभकामना आदानप्रदान कार्यक्रममा नेपाली काँग्रेसका सक्रिय सदस्यहरू सहित ३० जना नेकपा प्रवेश गरेको नेकपा राक्सिराङका अध्यक्ष हस्तबहादुर मोक्तानले जानकारी दिए ।
उनीहरुलाई नेकपा मकवानपुरका जिल्ला सचिवालय सदस्य लालबहादुर थापा, गाउँपालिका इन्चार्ज बनस्तम थिङ, सह इन्चार्ज सुन्तली चेपाङ लगायतले नेकपामा स्वागत गरेका थिए । नेकपा प्रवेश गर्ने केही कार्यकर्ता केहि दिनअघि मात्र जबरजस्ती काँग्रेस प्रवेश गराइएका युवाहरु रहेको गाउँपालिका अध्यक्ष मोक्तानले जानकारी दिए ।
कार्यक्रममा नेकपा नेता कृष्णबहादुर प्रजा, नेकपा वडा इन्चार्ज सिङ्गराम रुम्बा लगायत नेता कार्यकर्ताको उपस्थिति रहेको थियो । कार्यक्रम वडा कमिटी अध्यक्ष बबिराम मोक्तानको अध्यक्षतामा भएको थियो ।