भरतपुर/चितवन : पश्चिम रुकुममा भएको घटनाको संयुक्त दलित संघर्ष समिति चितवनले लायन्सचोकदेखि भरतपुरको चौबिसकोठीसम्म विरोध र्याली र उज्यालोमा दीप प्रज्वलन गरी विरोध जनाएका छन् ।
कार्यक्रममा बोल्दै नेपाल दलित मुक्ति मोर्चाका केन्द्रीय सचिवालय सदस्य खेमबहादुर दर्जीले दलित समुदायहरुले हतियार बनाउन जान्ने मात्र होइन चलाउन पनि जानेका हुन्छन्, त्यसैले कसैले पनि दलित समुदाय कमजोर छ भनेर नहेप्न चेतावनी दिए । उनले घटनाको विरोध गर्दै आवश्यक परे जस्तोसुकै आन्दोलन गर्न दलित समुदाय तयार रहेको बताए ।
पश्चिम रुकुममा सुनियोजित रुपमा घटाइएको घटना हो र जनप्रतिनिधिहरुकै मिलेमतोमा घटना घटाइएको नेपाल दलित संघका पूर्व केन्द्रीय उपसभापति डि.बि. परियारले आरोप लगाए । त्यो घटनालाई तोडमोड गर्न हरेक खालका षडयन्त्रहरु रचिएकोले दलित समुदाय कुनै पनि हालतमा राजनैतिक हस्तक्षेपमा मौन बस्न नहुने उनकोे भनाइ थियो ।
नेपाल दलित संघ चितवनकी सभापति शान्ति परियारले दलित समुदायको आत्मसम्मान भेरी नदीमा गएर सेलाएको भन्दै साङ्केतिक रुपमा विरोध गरेको बताइन् । उनले कागजको पानामा छुवाछुत अन्त्य भयो भनेर लेखेर मात्र नहुने सामाजिक रुपमा विभेदको चेतना अन्त्य हुनुपर्ने उनको कथन थियो ।
कार्यक्रममा विश्वकर्मा सुनचाँदी व्यवसायी सञ्जालका केन्द्रीय संयोजक अर्जुन रसाइलीले गणतन्त्र भएको मुलुकमा २१औं शताब्दीमा दलित भएकै कारण नरसंहार हुन्छ भने देशमा गणतन्त्र आएको कुनै अर्थ नरहेको बताए । दलित समुदायको जुन संघर्ष र बलिदानले गणतन्त्र स्थापना भएको हो त्यो कसैले पनि बिर्सिन नहुने उनले भने ।
कार्यक्रममा रुकुम घटनाका मृतकहरूको सम्झनामा श्रद्धाञ्जली तथा मौनधारण समेत गरिएको थियो ।
- ADVERTISEMENT -
