रत्ननगर नगरपालिकाद्वारा रेडियो कक्षा सुरु

रत्ननगर, चितवन । रत्ननगर नगरपालिकाले चितवनमै पहिलो पटक रेडियो कक्षा सुरु गरेको छ । लकडाउनका कारण विद्यालयमा पठनपाठन गराउन सक्ने अवस्था नरहेपछि वैकल्पिक शिक्षाको रुपमा सो नगरपालिकाले रेडियो मार्फत विद्यार्थीहरुलाई पढाउनु सुरु गरेको हो ।
रत्ननगरका मेयर नारायण वनले रेडियो अर्पणको स्टुडियोमा रेडियो कक्षाको शुभारम्भ गरेका छन् । सो अवसरमा उनले नगरको शैक्षिक स्तर खस्किन नदिन रेडियो कक्षा सुरु गरिएको बताए । मुलुकमा लकडाउन सुरु भएपछि अनलाइन कक्षा सञ्चालनको होडबाजी चलेको छ । आर्थिक अवस्था कमजोर भएका विद्यार्थीहरुको पहुँच इन्टरनेट र सुविधायुक्त मोवाइलमा नहुने भएकाले रेडियो कक्षा सुरु गरिएको उनले बताए ।
पहिलो चरणमा सामुदायिक र संस्थागत विद्यालयमा कक्षा ८ मा अध्ययन गर्ने विद्यार्थीहरुका लागि रेडियो कक्षा सुरु गरिएको हो । पहिलो चरणमा कक्षा ८ को नेपाली अंग्रेजी र सामाजिक विषयको कक्षा सुरु भएको छ । पहिलो चरणको रेडियो कक्षाको प्रभावकारिता मूल्याङकन गरी अन्य कक्षाको कार्यक्रम सञ्चालन गर्ने योजना रहेको मेयर वनले बताए ।
जिल्लामै रेडियो कक्षा सञ्चालन गर्ने गरी अन्य पालिकाहरुसँग पनि सहकार्य गर्ने प्रयास भइरहेको मेयर वनले बताए । रत्ननगरमा २९ सामुदायिक, २४ संस्थागत विद्यालय रहेका छन् । नेपाल सरकारले जारी गरेको वैकल्पिक प्रणालीबाट विद्यार्थीको सिकाइ सहजीकरण निर्देशिका २०७७ बमोजिक वैकल्पिक शिक्षाको रुपमा रेडियो कक्षा सुरु गरिएको नगर शिक्षा अधिकारी बद्रिनारायण शर्माले जानकारी दिए ।