कार्तिक १ गतेदेखि मनकामना मन्दिर सञ्चालनमा ल्याउने तयारी

गोरखा / कोरोना प्रभावका कारण विगत ६ महिनादेखि बन्द रहेको देशकै चर्चित धार्मिक स्थल मनकामना माईको मन्दिर कार्तिक १ गतेदेखि खुल्ने संकेत देखिएको छ । ताप्लेजुङमा बुधबार सञ्चारकर्मीहरुसँग कुरा गर्दै संस्कृति, पर्यटन तथा नागरिक उड्डयनमन्त्री योगेश भट्टराईले कार्तिक १ गते संचालनमा ल्याउने तयारी भइरहेको जानकारी दिए ।
ओलाङचुङ्गोलास्थित बोर्डर आउट पोष्ट (बिओपी) को उद्घाटनका क्रममा मन्त्री भट्टराईले भने, “कोभिड–१९ का कारण लामो समयदेखि बन्द रहेका धार्मिक तथा साँस्कृतिक क्षेत्रलाई क्रमशः निश्चित सङ्ख्यामा खोल्दै लैजाने सरकारको तयारी छ ।”
मन्त्री भट्टराईले आगामी मन्त्रिपरिषद्को बैठकमा धार्मिक क्षेत्रलाई खुला गर्ने प्रस्ताव लैजाने र पारित भएमा कात्तिकको शुरुदेखि क्रमशः खोल्दै लगिने बताउँदै दशैँ, तिहारजस्ता चाडबाड नजिकिएकाले र लामो समयदेखिको बन्दाबन्दीले धार्मिक तथा साँस्कृतिक पर्यटनको क्षेत्र नै नराम्रोसित प्रभावित भएको अवस्थामा स्वास्थ्य सतर्कतासहित क्रमशः खोल्दै लैजाने स्पष्ट पारे ।