७ महिनामा १४६ घरेलु हिंसाका घटना दर्ता

मकवानपुर / मकवानपुरमा चालु आर्थिक वर्षको ७ महिनाको अवधिमा १४६ वटा घरेलु हिंसाका घटना दर्ता भएका छन् । जिल्ला प्रहरी कार्यालय मकवानपुरका अनुसार, चालु आवको गत साउनदेखि माघसम्म २१५ वटा महिलामाथि हुने हिंसाका घटना दर्ता भएकोमा १४६ वटा घरेलु हिंसा दर्ता भएको हो ।
जिल्ला प्रहरी कार्यालय मकवानपुरको तथ्याङ्कअनुसार चालु आर्थिक वर्षको साउनमा २१ वटा, भदौंमा १४ वटा, असोजमा २३ वटा, कार्तिकमा १४ वटा, मंसिरमा २६ वटा, पुसमा २३ वटा र माघमा २५ वटा घरेलु हिंसाका घटना दर्ता भएको हो । तीमध्ये १२४ घरेलु हिंसाको घटनाको किनारा लगाएको जिल्ला प्रहरी कार्यालय मकवानपुरको महिला, बालबालिका तथा जेष्ठ नागरिक सेवा केन्द्र शाखाले जनाएको छ ।
यस्तै, जिल्लामा अन्य प्रकृतिका महिला हिंसाका ६९ वटा अन्य प्रकृतिका घटना दर्ता भएको छ । तीमध्ये ५७ वटा घटनाको किनारा लगाएको जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक जयश्वर रिमालले जानकारी दिए ।
उनका अनुसार, चालु आवको साउनमा १० वटा, भदौमा ६ वटा, असोजमा १६ वटा, कार्तिकमा ८ वटा, मंसिरमा ११ वटा, पुसमा ६ वटा, माघमा १२ वटा अन्य प्रकृतिका घटना दर्ता भएको छ । -तु खबरबाट ।