प्रचण्डको सुरक्षामा पुनः डीएसपी कमाण्डकै टोली

काठमाडौं / नेकपा माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल प्रचण्डको सुरक्षा बढाइएको छ ।
केपी शर्मा ओलीले घटाएको सुरक्षा ‘थ्रेट’ भएको भन्दै शेरबहादुर देउवा प्रधानमन्त्री भएसंगै बढाइएको हो ।
ओली नेतृत्वको सरकारले प्रचण्डको सुरक्षामा रहेका डिएसपीलाई हटाएर नेपाल प्रहरीका सईको कमाण्डमा टोली खटाएको थियो । तर, देउवा नेतृत्वको सरकारले पुनः डिएसपीकै कमाण्डमा टोली खटाएको छ ।
प्रचण्डले आफ्नो सुरक्षामा डिएसपीकै कमाण्डको टोलीको व्यवस्थापन मिलाइदिन गृहसंग आग्रह गर्दै आएका थिए ।
प्रचण्डको सुरक्षाको लागि ४० बढी सशस्त्र प्रहरी र नेपाल प्रहरीका २७ जना थिए । सशस्त्र टोलीको नेतृत्व इन्सपेक्टरले गर्दै आएका थिए भने प्रहरीको नेतृत्व डीएसपीले गर्दै आएका थिए । ओली सरकारले त्यसलाई कटौती गरेको थियो । देउवा सरकारले पुरानै सुरक्षा टोली खटाउन आदेश दिएको छ ।
प्रचण्ड सशस्त्र युद्धबाट आएको नेता भएकाले पनि उनलाई सुरक्षा चुनौती अन्य नेताको तुलानामा बढी भएको सुरक्षा अधिकारीहरुले बताएका छन् ।