बुधबारदेखि ‘न्यूजप्रवाह साप्ताहिक’ पत्रिका प्रकाशन हुने

चितवन / बि एण्ड बि मिडिया प्रा.लि. भरतपुर–१६ ले बुधबारदेखि ‘न्यूजप्रवाह साप्ताहिक’ पत्रिका प्रकाशन गर्ने भएको छ । दुई दशक लामो समय मिडियामा आवद्ध बि एण्ड बि मिडिया प्रा.लि.का संचालक बबिलाल तामाङले ‘न्यूजप्रवाह साप्ताहिक’ पत्रिका सुरु गर्न लागिएको जानकारी दिए ।
अहिलेको विषम परिस्थितिमा पत्रिका संचालन गर्नु भनेको फलामको चिउरा चपाउनु जस्तै हो तथापि संघर्ष गरेरै अगाडि बढ्ने संचालक तामाङको भनाइ छ । उनले कोभिड–१९ को महामारीले लोकलदेखि सबै राष्ट्रिय दैनिक पत्रपत्रिका बन्द हुँदै गरेको अवस्थामा पत्रिका प्रकाशन सुरु गर्नु निकै चुनौतिपूर्ण भएको बताए ।
जनताले सुसूचित हुने अधिकारलाई कुन्ठित हुन नदिन जुनसुकै परिस्थितिमा पनि आफू पछि नपर्ने उनको धारणा छ । समाजमा लुकेर रहेका आवाजविहीनहरूको आवाजलाई बुलन्द बनाउने उद्देश्यअनुरूप ‘न्यूज प्रवाह साप्ताहिक’ पत्रिकाको प्रकाशन शुभारम्भ गरिएको हो ।
पत्रिका प्रकाशन पश्चात पाठकवर्गलाई प्रतिक्रिया दिन हुन उनले आग्रह गरेका छन् । सबैको सल्लाह सुझावलाई आत्मसाथ गर्दै पत्रिकालाई अघि बढाउँदै लैजाने उनको भनाइ छ ।
मिडिया प्रा.लि.ले दुई वर्षदेखि ‘न्यूजप्रवाह डटकम’ (अनलाइन पत्रिका) पनि संचालन गर्दै आइरहेको छ ।