छठ पर्व सकियो, उदाउँदो सूर्यलाई अर्घ दिएर सम्पन्न

चितवन / देशैभर मनाइरहेको चार दिनदेखिको छठ पर्व आज बिहीबार बिहान सम्पन्न भएको छ । विशेषगरी तराईवासी र मैथिल समाजले मनाउने चाड उदाउँदो सूर्यलाई अर्घ दिएर सम्पन्न गरिएको हो ।
छठ पर्वमा परिवारका सबै सदस्य मिलेर उदाउँदो सूर्यलाई गाईको दूधको अर्घ दिएर पर्व सम्पन्न गरेका छन् । छठको पहिलो दिन नुहाई खाई, दोस्रो दिन खरना, तेस्रो दिन अस्ताउँदो सूर्यलाई अर्घ र अन्तिम दिन उदाउँदो सूर्यलाई अर्घ दिएर सम्पन्न भएको हो ।
पहिले सहर गाउँका मुख्य मुख्य पोखरी, तलाउ, नदीमा मात्र मनाइने छठ पूजा यसपालि टोलटोल गाउँगाउँका हरेक पोखरी तलाउ नदीमा पनि मनाइएको चितवनका संजयकुमार गुप्ताले बताए । उनका अनुसार छठ पर्वमा बालबालिकादेखि जेष्ठ नागरिकसम्म सहभागी हुने गरेका छन् ।
पछिल्लो समयमा छठ पर्वमा अन्य क्षेत्रका वासिन्दा पनि सहभागी क्रम बढ्दो छ । दिनानुदिन छठमाई प्रतिको आस्था बढदै गएकाले अहिले हिन्दुमात्र नभई केही अन्य धर्मावलम्बीहरुले पनि मनाउन थालेका छन ।
यो पर्व मनाउँदा चर्मरोग निको हुने, पुत्रलाभ, आर्थिक समृद्धि तथा सुख, शान्ति प्राप्त हुने जनविश्वास रहि आएको छ ।