चितवनमा मालेको राष्ट्रिय महाधिवेशन

चितवन / नेकपा (माले)ले पार्टीको ८औं राष्ट्रिय महाधिवेशन चितवनमा हुने भएको छ । मालेले पार्टीको ८औं राष्ट्रिय महाधिवेशन चितवनमा हुने बिहीबार पत्रकार सम्मेलन गरी जानकारी गराएको हो ।
मालेका महाधिवेशन मूल आयोजक समितिका संयोजक तथा पार्टी स्थायी समिति सदस्य दिननाथ घिमिरेका अनुसार देशभरबाट ३५० प्रतिनिधि सहभागी हुने जानकारी दिए । उनले कार्तिक २७ देखि २९ गतेसम्म हुने महाधिवेशनको लागि तयारी तीव्र पारिएको बताए ।
मालेको महाधिवेशन नारायणगढस्थित नारायणी कला मन्दिरमा हुने बताइएको छ । महाधिवेशनबाट ७५ सदस्यीय केन्द्रीय कमिटी, ११ सदस्यीय स्थायी समिति, र २१ जना पोलिटब्यूरो सदस्य चयन हुने उनको भनाइ छ । त्यस्तै, २० वटा विभागको नेतृत्व पनि चयन हुनेछ ।
महाधिवेशनको उद्घाटन पूर्व नारायणगढमा जुलुस निकालिने आयोजकको जनाएको छ । प्रदेश संरचना र एमसीसी खारेज अभियानलाई थप सशक्त बनाउँदै स्थानीय तहलाई अधिकार सम्पन्न बनाउने कुरामा पार्टीका मुख्य ध्यान हुने बताइएको छ ।
नेकपा माले २०३५ मा स्थापना भएको हो भने २०५८ मा पुनर्गठन गरिएको थियो ।