कांग्रेस बागमती प्रदेश अधिवेशन भोलिबाट हेटौंडामा सुरु

मकवानपुर / नेपाली कांग्रेसको १४ औँ महाधिवेशन अन्तरगत भोलिबाट हेटौंडामा सुरु हुने बागमती प्रदेश अधिवेशनको तयारी तीव्र पारिएको छ । वन विज्ञान अध्ययन संस्थान (फरेस्टी) को मैदानमा आयोजना हुने अधिवेशनका आवश्यक सम्पूर्ण तयारीलाई तीब्रताका साथ अघि बढाइएको कांग्रेस मकवानपुरका प्रवक्ता एवम् अधिवेशन सचिवालयका संयोजक प्रदिप कोइरालाले जानकारी दिए ।
उनका अनुसार उद्घाटन सत्रको लागि मञ्च व्यवस्थापन, स्टल निर्माण, सचिवालय स्थापना, सवारी पार्किङ् व्यवस्थापन, बाहिर जिल्लाबाट आउने पाहुनालाई स्वागत तथा खाना र आवासको प्रबन्ध मिलाउने देखि प्रचारप्रसारको काम पनि भइरहेको छ । हेटौंडा बजारका मुख्यमुख्य स्थानमा कांग्रेसको झण्डा पहराउने पर्चा पम्प्लेट टाँस्ने काम भइरहेको समेत उनले बताए ।
भोलि १२ बजे हेटौंडाको बुद्ध चोकबाट र्याली निकालेर फरेष्टी क्याम्पसको मैदानमा पुगेपछि सभामा परिणत हुने जनाइएको छ । कांग्रेस सभापति एवम् प्रधानमन्त्री शेरबहादुर देउवाले उद्घाटन सत्रलाई सम्बोधन गर्नेसमेत प्रवक्ता कोइरालाले बताए । त्यसको लागि सुरक्षा प्रवन्ध चुस्त दुरुस्त पार्न, सुरक्षा निकायलाई खबर गरिएको र सो स्थानमा कांग्रेसका नेता कार्यकर्ता स्वयम् सेवकको रुपमा खटिने समेत उनले बताए ।