फोनिज चितवनको भोलि अधिवेशन, तीन पत्रकार सम्मानित गरिने

चितवन / नेपाल आदिवासी जनजाति पत्रकार महासंघ (फोनिज) चितवन शाखाले भोलि शनिबार ८औँ साधारण सभा तथा चौथौ अधिवेशन गर्ने भएको छ । सो अवसरमा तीन जना पत्रकारलाई सम्मान गर्ने कार्यक्रम रहेको फोनिज चितवनका अध्यक्ष सन्दिपकुमार श्रेष्ठले जानकारी दिए ।
अध्यक्ष श्रेष्ठका अनुसार फोनिज चितवनका संस्थापक अध्यक्ष सन्तकुमार चौधरी, तामाङ पत्रकार संघ चितवनका अध्यक्ष बबिलाल तामाङ र कालिका एफएमका प्रतिमा कुमाल रहेका छन् । सम्मानित हुने चौधरी पिबिएम न्यूज डटकमका प्रधान सम्पादक हुन् । त्यस्तैगरी तामाङ न्यूजप्रवाह साप्ताहिकका प्रधान सम्पादक हुन् भने कुमाल कालिका एफएमका समाचारवाचिका हुन् ।
फोनिजका चितवनका अध्यक्ष सन्दीपकुमार श्रेष्ठको संयोजकत्वमा सल्लाहकार ईश्वरकुमार जोशी, अमरदिप प्रधान, सन्तकुमार चौधरी र वीरबहादुर सिन्जाली मगरको समितिले उनीहरुलाई छनोट गरेको हो ।
आदिवासी जनजाति पत्रकारको हौसला बढाउन, क्षमता अभिवृद्धि गर्न, मिडिया क्षेत्रमा टिकाई राख्न सम्मान गर्न लागिएको फोनिज अध्यक्ष श्रेष्ठले बताए ।
यस्तै फोनिजले पहिलो पटक आफ्नो स्थापना दिवस तथा अधिवेशनको अवसर पारेर स्मारिका प्रकाशन गर्ने भएको छ । उक्त स्मारिकाको ‘फोनिज सन्देश चितवन’ नामाकरण गरिएको छ । आदिवासी जनजाति पत्रकारहरुको छाता संगठन फोनिजमा १७ जनजाति समावेश छन् । नयाँ र पुराना गरी १ सय २२ जना आवद्ध रहेका छन् ।