करेन्ट लगाएर माछा मार्ने ३ पक्राउ, ५ हजार जरिवाना

दैलेख / गुराँस गाउँपालिका–२ लोहोरे खोलामा करेन्ट लगाएर माछा मारेको आरोपमा ३ जना पक्राउ परेका छन् । पक्राउ परेका उनीहरुलाई मंगलबार स्थानीय प्रशासनले जनही ५ हजार जरिवाना गरेको छ ।
प्रहरीले लोहोरे खोलामा करेन्ट लगाएर माछा मारिरहेको अवस्थामा गुराँस गाउँपालिका–४ का ३३ वर्षीय हर्क बहादुर शाही, २६ वर्षीय रमेश पुन र २६ वर्षीय रबिन्द्रबहादुर शाहीलाई पक्राउ गरेको हो ।
जिल्ला प्रहरी कार्यालय दैलेखका डीएसपी भुवनेश्वरप्रसाद शाहका अनुसार पक्राउ परेकाहरुको साथबाट माछा मार्न प्रयोग गरिएका सामानहरु १२ भोल्टको ब्याट्री, मेसिन, क्वाएल रड, माछा मार्ने जाल र झण्डै ६ केजी माछा नियन्त्रणमा लिइएको छ ।
उनीहरुलाई मंगलबार नै जलचर संरक्षण ऐन २०१७ बमोजिम कारबाहीका लागि जिल्ला प्रशासन कार्यालय दैलेखमा पेस गरिएको थियो । प्रमुख जिल्ला अधिकारी हरि प्याकुरेलले उनीहरुलाई जनही ५ हजार जरिवाना गर्ने निर्णय सुनाएका थिए । उनीहरु सबैले जरिवाना तिरेर बुधवार छुटेका छन् ।