चितवनमा फोनिज संघीय महाधिवेशनको तयारी तिब्र, ४ सय बढी प्रतिनिधि आउने

–प्रमिला तामाङ
चितवन । नेपाल आदिवासी जनजाति पत्रकार महासंघ (फोनिज) केन्द्रले आगामी माघ ७ र ८ गते हुने संघीय सातौं राष्ट्रिय महाधिवेशनको तयारी तिब्र पारेको छ । उक्त महाधिवेशनका लागि फोनिज केन्द्रीय समितिका पदाधिकारीहरुले जिल्ला शाखाका समितिसँग शुक्रबार विशेष भेटघाट तथा छलफल गरेका छन् ।
चितवनको सौराहामा हुने महाधिवेशनका लागि २३ लाख खर्च अनुमान गरिएको अध्यक्ष डण्ड गुरुङले जानकारी दिए । उक्त महाधिवेशनका लागि फोनिज चितवन शाखाले सहजीकरण गर्ने भएको हो । भौगोलिक दूरीका हिसाबले चितवन पायक पर्ने भएकाले सौराहालाई महाधिवेशन स्थल छानिएको हो ।
महाधिवेशनका लागि देशैभरका ६० वटा जिल्ला शाखाका प्रतिनिधिहरुको उपस्थिति हुने फोनिज केन्द्रका महासचिव मनोज घर्ती मगरले जानकारी दिए । महासचिव मगरका अनुसार ४ सय बढी महाधिवेशन प्रतिनिधिहरु चितवन आउने भएका हुन् ।
उक्त बैठकमा जनजातिलाई केन्द्रित गर्दै अवलोकन भ्रमण, चितवनको शान र मान, देशैभरका प्रतिनिधिलाई केन्दबिन्दु मानेर चितवनको सौराहामा महाधिवेशन गर्न लागिएको फोनिज केन्द्रका वरिष्ठ उपाध्यक्ष गजुर्धन राईले बताए ।
देशकै चर्चित पर्यटकीय गन्तव्य, हरेक कोणबाट सुविधा सम्पन्न भएकाले महाधिवेशनलाई सभ्य र भब्यकासाथ सम्पन्न गर्न सौराहा सहज हुने संघीय कोषाध्यक्ष अमरध्वज तामाङले बताए ।
बैठकमा नेपाल आदिवासी जनजाति पत्रकार महासंघ (फोनिज) केन्द्रका अध्यक्ष डण्ड गुरुङ, वरिष्ठ उपाध्यक्ष गर्जुधन राई, महासचिव मनोज घर्ती मगर र कोषाध्यक्ष अमरध्वज तामाङ, बागमती प्रदेश फोनिजका उपाध्यक्ष राजेश रुम्बा तामाङ, फोनिज चितवनका संस्थापक अध्यक्ष सन्तकुमार चौधरी, निवर्तमान अध्यक्ष सन्दिप श्रेष्ठलगायतको उपस्थिति थियो ।
पछिल्लो समय चौतर्फी दृष्टिकोणबाट पायक पर्ने तथा सुविधा सम्पन्न भएकाले विभिन्न ठूला र साना पार्टीले महाधिवेशन चितवनमा नै गर्दै आएका छन् । चितवनलाई नेपालकै दोश्रो राजधानीको रुपमा समेत हेरिँदै आएको छ ।