–प्रमिला तामाङ
चितवन । नेपाल इन्जिनियर्स एशोसिएसनको आगामी माघ ७ गते हुने निर्वाचनलाई लक्षित गरी उम्मेदवारहरुको परिचयात्मक कार्यक्रम सम्पन्न भएको छ । एकीकृत प्रगतिशील इन्जिनियर समूह जिल्ला निर्वाचन परिचालन समिति चितवनको आयोजनामा उम्मेदवारहरुको परिचयात्मक कार्यक्रम भरतपुरमा सम्पन्न भएको हो ।
भरतपुर महानगरपालिकाकी मेयर तथा प्रमुख अतिथि रेनु दाहालले दियो प्रज्वलन गरी कार्यक्रम उद्घाटन गरेकी हुन् । मेयर दाहालले माघ ७ गते हुने निर्वाचनका लागि अग्रिम सफलताको शुभकामना व्यक्त गरिन् ।
एशोसिएसनको ३३औँ केन्द्रीय कार्यकारिणी समिति र बागमती प्रदेशको दोस्रो कार्यकारिणी समितिको निर्वाचनका उम्मेदवारहरुले आफ्नो परिचयसँगै चुनावी घोषणापत्रसमेत सार्वजनिक गरेका थिए ।
नेकपा माओवादी केन्द्र, नेकपा एकीकृत समाजवादी र जनता समाजवादी पार्टीको सुभेच्छुक इन्जिनियर्सहरुले एकीकृत प्रगतिशील इन्जिनियर्स समूह नामक चुनावी प्यानल बनाई निर्वाचनमा जान लागेका हुन् । सो प्यानलबाट केन्द्रीय सभापति र बागमती सभापतिको उम्मेदवारमा क्रमश डा. हरिराम पराजुली र गिरीधर मिश्र रहेका छन् ।
एशोसिएसनको केन्द्रीय उपाध्यक्षमा आ.न्हसला तुलाधर, महासचिवमा डा. शंकर ढकाल, उपमहासचिवमा डा. समित थापा, कोषाध्यक्षमा इ. श्याम नारायण चौधरी, सह कोषाध्यक्षमा इ. स्मिता भट्ट प्यानलबाट उम्मेदवार रहेका छन् । त्यस्तै बागमती प्रदेशतर्फ उपाध्यक्षमा इ. शिवप्रसाद भण्डारी, सचिवमा इ. अमरचन्द्र निराला, सह सचिवमा इ. कमल पोखरेल र कोषाध्यक्षमा इ. उमेशजंग थापा उम्मेदवार छन् । परिचयात्मक कार्यक्रममा केन्द्र र बागमती प्रदेशका विभिन्न पदका उम्मेदवारहरुको उपस्थिति रहेको थियो ।
कार्यक्रम एकीकृत प्रगतिशील इन्जिनियर समूह चितवनका अध्यक्ष तथा भरतपुर महानगरपालिका वरिष्ठ ई. सूर्यप्रकाश लामाको सभापतित्वमा सम्पन्न भएको थियो ।
- ADVERTISEMENT -
