राप्ती ५ मा खानेपानी र सार्वजनिक शौचालयको निर्माण गर्ने वडाध्यक्ष तामाङको निर्णय

राप्ती / राप्ती नगरपालिका वडा नं. ५ का वडाध्यक्ष सीताराम बल (तामाङ)ले खानेपानी र सार्वजनिक शौचालय निर्माण गर्ने बताए । वडाध्यक्ष बलले पदभार ग्रहणसँगै खानेपानी र सार्वजनिक शौचालयको निर्माण गर्ने निर्णय गरेका हुन् ।
‘चेपाङ मार्गहुँदै पहाडतिरबाट बजार आउने गाडीका यात्रुहरुलाई सार्वजनिक शौचालयको ठूलो समस्या छ’ उनले भने, ‘गाडीका लागि बसपार्क अर्को समस्या छ ।’ उक्त दुबै समस्यालाई प्राथमिकता राखेर कार्यान्वयन गरिने सँगसँगै खानेपानी व्यवस्थापनलाई पनि जोड दिने उनले बताए ।
गाडीमा यात्रुहरु संख्यात्मक रुपमा बढी आउने भएकाले अन्त घरमा शौच गर्न जाने समस्या टड्कारो देखिएकोले छिट्टै नै प्रक्रियालाई अघि बढाइने उनको भनाइ छ । यात्रुहरुलाई खानेपानीको समस्या पनि उस्तै भएकोले सँगसँगै व्यवस्थापन गरिने लक्ष्य रहेको उनले बताए ।
उनले राप्ती वडा नं. ५ को बजार व्यवस्थापन अस्तव्यस्त अर्को समस्या भएको जिकिर गरे । सो अस्तव्यस्त बजारलाई छिट्टै नै व्यवस्थित गरिने र सँगसँगै सरसफाइलाई पनि ध्यान दिइने उनले बताए ।
स्थानीय तह निर्वाचन २०७९ को एमालेबाट निर्वाचित वडाअध्यक्ष बल यसअघि शिखर सामुदायिक वन उपभोक्ता समितिको अध्यक्ष समेत रहेका छन् ।