भरतपुर विमानस्थल अगाडिका घरटहरा भत्काइयो

चितवन / सडक डिभिजन कार्यालय भरतपुरले सडक बिस्तार गर्न भन्दै विमानस्थल वरपरका घरटहरा भत्काएको छ । लालपुर्जा हातमा भएको प्रमाण देखाएर सुरक्षित वसोवास सहितको क्षतिपूर्ति माग गरेका स्थानीयलाई बेवास्ता गरी भत्काएकोमा स्थानीयले विरोध जनाएका छन् ।
सर्वाेच्चमा मुद्दा हुँदाहँुदै भरतपुर विमानस्थल अगाडिका घर टहरा भत्काइएकोले स्थानीय आक्रोशित भएका हुन् । सडक मापदण्डमा रहेका घरटहरा हटाउन डिभिजनले भने यस अघि नै पटक पटक सूचना जारी गरेको थियो । तर अटेर गरेपछि भत्काइएको सडक डिभिजनले जनाएको छ । सर्वाेच्च अदालतमा मुद्दा परेको भए पनि अन्तिम फैसला आएको सडक डिभिजनको दावी छ ।
यद्यपि हातमा लालपुर्जा भएपछि सरकारले उठीवास लगाउन मिल्छ भन्दै स्थानीयले प्रश्न गरेका छन् । सडक विस्तार विकासको आयोजना भएकाले सहयोग गर्न तयार रहेपनि लालपुर्जा भएको जग्गा भवनको क्षतिपूर्ति दिन उनीहरुको आग्रह छ । सडकले भने पुर्व पश्चिम सडक विस्तारका क्रममा तथा त्यसपछिका दिनमा पनि मापदण्ड कायम गरेर क्षतिपूर्ति दिइसकेको दाबी गर्दै आएको छ ।
हातमा लालपुर्जा भएको बारे भने लगत कट्टा गर्न बाँकी रहेको सडक डिभिजनले बताए पनि स्थानीयको भने क्षतिपूर्ति नै नपाएको गुनासो छ । अहिले पुल्चोकदेखि गोन्द्राङ सडक विस्तारको कार्य चलिरहेको छ ।