पर्सामा एक महिलाद्वारा तिम्ल्याहा सन्तानको जन्म

वीरगञ्ज / पर्साकी एक महिलाले तिम्ल्याहा सन्तान जन्माएकी छन् । पर्साको पर्सागढी नगरपालिका वडा नं. ९ बस्ने ललितादेवी थरुनीले एकै पटक तीन वटा छोरालाई जन्म दिएकी हुन् ।
बिहीबार शल्यक्रिया गरेर उनको तीन वटा बच्चा निकालिएको प्रभु अस्पताल वीरगञ्जले जनाएको छ । प्रभु हस्प्टिलको सञ्चालिका स्त्री तथा प्रसुति रोग विशेषज्ञ डा. लक्ष्मी थापा, एनेस्थेसिया तर्फका डा. सन्देश यादव, शिशु तथा बाल रोग विशेषज्ञ डा.नविन झाको टिमले शल्यक्रिया गरेर बच्चा निकालेको थियो ।
उनले १० वर्षअघि वृज चौधरी थारुसँग विवाह गरेकी थिइन् । विभिन्न अस्पताल चाहारेपनि १० वर्षसम्म चौधरी दम्पतीको कुनै सन्तान हुन सकेन । आईभीएफ प्रविधिबाट गर्भ राखिएको थियो । आमा तथा तीनवटै बच्चाको स्वास्थ्य अवस्था सामान्य रहेको डाक्टर थापाले जानकारी दिइन् ।