चितवनको क्याम्पाचौरमा ‘चितवन म्युजिक फेस्ट’ हुने

चितवन / डिजिफ्लाई ब्राण्डिङ एजेन्सी र एस्ट्रल युथ सोसाइटी भरतपुरको संयुक्त आयोजनामा ‘चितवन म्युजिक फेस्ट’ हुने भएको छ । अंग्रेजी नयाँ वर्ष २०२३ को अवसर पारेर नारायणगढको क्याम्पाचौरमा ‘चितवन म्युजिक फेस्ट’ हुने शनिबार पत्रकार सम्मेलन मार्फत जानकारी दिएको हो ।
पत्रकार सम्मेलनमा डिजिफ्लाई ब्राण्डिङ एजेन्सीका सिईओ प्रसुन श्रेष्ठले पौष १६ र १७ गते (डिसेम्बर ३१ र जनवरी १ तारिख) मा हुने कार्यक्रममा सांगितिक प्रस्तुतिहरुसँगै खानाका स्टलहरु पनि रहने जानकारी दिए । कार्यक्रममा सविन राई, नबिन के भट्टराई, कालीप्रसाद बास्कोटा, कबवेब ब्याण्ड र दि इलिमेन्ट्स तथा स्थानीय कलाकारहरुको पनि प्रस्तुति रहने आयोजकले जनाएको छ ।
एस्ट्रल युथ सोसाइटीका अध्यक्ष प्रकाश भुजेलले कार्यक्रम परिसरभित्र १७ वटा खानाका स्टलहरु रहने बताए । ती सबै स्टल निःशुल्क उपलब्ध गराइने उनको भनाइ छ । तर व्यवसायीहरुले कार्यक्रम प्रायोजकको उत्पादन मात्रै बिक्री गर्नुपर्ने बताइएको छ भने गेम स्टल, फेस पेन्टिङ स्टल पनि रहनेछ ।
आयोजकले दुई दिनमा दश हजार दर्शकले कार्यक्रमको अवलोकन गर्ने अनुमान गरेका छन् भने कार्यक्रम सम्पन्न गर्नका लागि ६५ लाख रुपैयाँ खर्च हुने अनुमान गरिएको छ । दर्शकका लागि एक हजार रुपैयाँको भिआईपी र पाँच सयको सामान्य टिकटको व्यवस्था गरिएको छ । कार्यक्रमले आन्तरिक पर्यटन प्रवर्द्धनमा टेवा पुग्ने आयोजकको विश्वास छ ।