चितवनमा पत्रकार आचार्यमाथि कुटपिट, दोषीलाई कारवाहीको माग

चितवन / मानव सेवा आश्रमद्वारा आयोजित क्याम्पाचौरमा भएको नेपथ्य कन्सर्टमा पत्रकार राजेन्द्र आचार्यमाथि कुटपिट गरिएको छ । रिपोर्टिङका लागि कार्यक्रम स्थलमा पुगेका आचार्यमाथि आइतबार साँझ कार्यक्रम स्थलमा बसेका बाउन्सरले आक्रमण गरेका हुन् ।
यसैबीच नेपाल पत्रकार महासंघ चितवनले एक विज्ञप्ति जारी गरी दोषीलाई कारवाही गर्न स्थानीय प्रशासनसँग जोडदार माग गरेको छ । विज्ञप्तिमा भनिएको छ, ‘स्वतन्त्र रुपमा पत्रकारिता गर्ने वातावरण बनाउन र शान्ति सुरक्षाको प्रत्याभूतका लागि माग गर्दछौं ।’
यस्तै, नेपाल आदिवासी जनजाति महासंघ पत्रकार महासंघ (फोनिज) ले विज्ञप्ति जारी पत्रकारमाथि कुटपिट निन्दनीय रहेको जनाएको छ । फोनिजले स्थानीय प्रशासनसँग उक्त घटनाको दोषीलाई कारवाही गर्न माग गरेको छ ।
पत्रकार आचार्य पत्रकार महासंघ चितवन शाखाका कोषाध्यक्ष हुन् । नेपाल टेलिभिजनको चितवन संवाददाताका रुपमा काम गरिरहेका आचार्य सौराहा अनलाईनका सञ्चालक समेत हुन् ।
पत्रकार बसन्त पराजुलीले पत्रकार माथिको आक्रमण निन्दनिय भएको भन्दै दोषी उपर कारवाही गर्न माग गरेका छन् । चितवनमा रहेर पत्रकारिता गरिरहेका पत्रकारहरुले मानव सेवाको लागि आयोजना गरिएको उक्त कार्यक्रममा पत्रकारमाथि नै अमानविय तरिकाले आक्रमण गरिनु दुःखद र गम्भिर रहेको बताएका छन् ।