‘खिचरा डान्स आइडल’को प्रस्तुति पुसको अन्तिम साता

खैरहनी / यही पुस २८ गतेबाट हुन गइरहेको आठौं खिचरा महोत्सवको लागि विद्यालयस्तरीय ‘खिचरा डान्स आइडल’को अडिसन शनिबार सम्पन्न भएको छ । महोत्सवको सचिवालयमा भएको अडिसनवाट १५ जना प्रतियोगीहरु अन्तिम चरणका लागि छनौट भएको अडिसनका संयोजक हरिशरण चौधरीले जानकारी दिए ।
त्यस्तै १० जना डिजिटल अडिसनबाट छनौट भएका सचिवालयले जनाएको छ । अडिसनवाट २५ जना विद्यार्थीहरु फाइनल राउण्डमा प्रवेश गरेका छन् ।
छनौट भएका प्रतियोगीहरुले महोत्सवको स्टेजमा पुस ३० गते प्रस्तुती दिने बताइएको छ । प्रतियोगितामा खिचरा डान्स आइडल हुनेले नगद ३० हजार रुपैयाँ र प्रमाण पत्र पाउने छन् । यसैगरी दोश्रो हुनेले नगद २० हजार तेश्रो हुनेले १० हजार नगद र प्रमाणपत्र प्राप्त गर्ने संयोजक चौधरीले बताए ।
स्कुले उमेरका भाइ बहिनीहरुको प्रतिभालाई सम्मान स्वरुप ‘खिचरा डान्स आइडल’ आयोजना गर्न लागिएको नृत्य समितिका संयोजक चौधरीको भनाइ छ ।
पूर्वी चितवनको खैरहनी ५ जबकौली, दुर्गा मन्दिर परिसरमा यहि पुस २८ गतेदेखि माघ ४ गतेसम्म खिचरा महोत्सव आयोजना हुँदैछ । डान्स आइडल छनौटका लागि नायक तथा गायक रोहितसिंह चौधरी र नायिका मुस्कान चौधरी निर्णायकको रुपमा रहेका थिए ।