चितवनमा एक करोड बढीको गरगहनासहित ३ भारतीय पक्राउ

चितवन / एक करोड बढी मूल्य पर्ने गरगहनासहति तीन जना भारतीय नागरिक पक्राउ परेका छन् । जिल्ला प्रहरी कार्यालय चितवनले बुधबार पत्रकार सम्मेलन गरी एक करोड बढी गरगहनासहित तीन जनालाई पक्राउ गरेको जानकारी दिए ।
प्रहरीका अनुसार सुराकीको आधारमा भारतीय डब्लु बी १२ ए भी ५५६६ नम्बरको टाटा कम्पनीको नेक्सन गाडीमा लुकाई छिपाई ल्याएका ती गहनासहित उनीहरूलाई पक्राउ परेको हो ।
पक्राउ पर्नेमा कार चालक भारत, उत्तर प्रदेश, बलिया जिल्ला, फेफना थाना बस्ने वर्ष ४२ का विनोद प्रसाद, भारत पश्चिम बङ्गाल, हौडा जिल्ला गोलावाडी पुलिस थाना, सल्किया स्कुलरोड कलकत्ता बस्ने वर्ष ५१ का गणपतकुमार तोसावर र सोही स्थानका वर्ष ४२ का नरेश बर्मा छन् । गाडीको सिट मुनी र विभिन्न स्थानमा लुकाई छिपाई ल्याएका सुनका ६३.८९८ तोला र हिरा जडित २२.८७८ तोला गहना प्रहरीले बरामद गरेको हो ।
ती गहना सुनचाँदी व्यवसायीसँगको रोहवरमा तौल र गुणस्तर जाँच गर्दा एक करोड १० लाख रुपियाँ बराबर भएको प्रारम्भिक अनुमान छ । पक्राउ परेका व्यक्तिहरू, गाडी र गरगहना राजश्व अनुसन्धान विभागमा पठाउने तयारी भएको प्रहरीले जानकारी दिए ।