बिमा वापतको रकम २५ हजार मृतकका श्रीमानलाई प्रदान

चितवन / भरतपुर वडा नं. २ मा अवस्थित सिद्धि विनायक बचत तथा ऋण सहकारी संस्था लि.ले बेदप्रसाद अधिकारीलाई राहत स्वरुप रु. २५ हजार प्रदान गरेको छ । संस्थाका शेयर सदस्य स्व. सुमित्रा अधिकारीको विमा वापतको रकम उनलाई आइतबार एक कार्यक्रमका बिच प्रदान गरेको हो । उनी स्व. अधिकारीका श्रीमान हुन् ।
संस्थाले सामाजिक उत्तरदायित्व वहन गर्दै संचालन गरेको जीवन सुरक्षा कोष अन्तर्गत सदस्य कल्याण कोष मार्फत उक्त रकम हस्तान्तरण गरेको व्यवस्थापक विकास पौडेलले जानकारी दिए । संस्थाको नीति नियम अनुसार एक वर्षदेखि पाँच वर्षभित्र मृत्यु भएमा १५ हजार, छदेखि दशभित्र मृत्यु भएमा २५ हजार, एघारदेखि पन्ध्रवर्षभित्र मृत्यु भएमा ३५ हजार र सोह्रदेखि बाइस वर्षभित्र मृत्यु भएमा ५० हजार प्रदान गर्ने व्यवस्था गरेको उनले बताए ।
उनका अनुसार बाइस वर्षसम्म रु. ५ सयका दरले बिमा वापतको रकम तिर्नुपर्नेछ भने २३ वर्षमा शेयर सदस्यलाई औषधि खर्च वापत रु. २५ हजार प्रदान गरिने छ । २३ वर्षभित्र शेयर सदस्यको बिमा स्वतः हुने उनले बताए ।
कार्यक्रममा संस्थाका सचिव मुकुन्दप्रसाद गौतम, कोषाध्यक्ष जयराम पाण्डे, सदस्य इन्दिरा पन्थलगायतको उपस्थिति रहेको थियो । कार्यक्रम रामप्रसाद घिमिरेको संयोजकत्वमा सम्पन्न भएको थियो ।