चितवन / भरतपुर २, क्षेत्रपुरमा बाँझो जमिनलाई खेतीयोग्य बनाउन डोजर लगाइएको छ । भरतपुर महानगरपालिका वडा नं. २ ले बाँझो रहेको जमिनको तथ्याङ्क लिएर खेती लगाउने अभियान थालेको वडाध्यक्ष मनोज रानाभाटले जानकारी दिए ।
उक्त बाँझो जमिन फँडानीका लागि वडा समितिकोे निर्णय अनुसार सुरु गरिएको हो । वडाध्यक्ष रानाभाटका अनुसार वडाभित्र रहेका १८ वटा टोलसँग बाँझो जमिनको तथ्याङ्क मागिएको थियो ।
- ADVERTISEMENT -
उनले तीमध्ये १० वटा टोलको जमिनको तथ्याङ्क आइसकेको बताए । तथ्याङ्क प्राप्त भएको मिल्स एरिया र रामेश्वर टोल विकास संस्थाभित्रको बाँझो जमिनमा सोमबारदेखि डोजर लगाएर झाडी फाँडेर खेती गर्न मिल्ने बनाउन थालिएको छ । उनका अनुसार ती जमिनमा समूहगतरुपमा खेती गर्न चाहनेहरुका लागि सूचना जारी गरिँदैछ ।
आमासमूह, टोल सुधार संस्थाजस्ता संस्थालाई जग्गा धनीले कुनै कामका लागि फिर्ता मागेको समयमा दिने गरी संस्थालाई सम्झौता गरेर जग्गा दिन लागिएको हो ।
- ADVERTISEMENT -
वडाभित्र रहेका ठूला प्लटमा फूल र तरकारी खेतीका लागि संस्थागतरुपमा जग्गा माग्ने क्रमसमेत सुरु भएको छ । क्रमशः वडाभरि नै झाडी फाँडेर खाली जमिन सङ्घसंस्थालाई खेतीका लागि दिइनेछ । यसरी खेती गर्नेले जग्गाधनीलाई कुनै भाडा तिर्नु पर्दैन ।
रानाभाटले भने, “हामी वडालाई नमुना बनाउने गरी काम अघि बढाउदैछौँ ।” जनघनत्व राम्रो भएको यस वडामा घरबाहेकका क्षेत्रमा जग्गा बाँझो छाडेर झाडीमा परिणत भएको छ । बाँझो जमिनको झाडी फाडेर खेती लगाएमा यसले सरसफाइ र सुन्दरता पनि दिने उनले बताए ।
