काठमाडौं / मनाङको तिमान खोलामा बाढी आउँदा एउटा काठेपुल बगाएको छ । जिल्ला प्रशासन कार्यालय मनाङका अनुसार मंगलबार परेको भारी वर्षाले राति करिब ८ बजे पुल बगाएको हो ।
लमजुङको बेशिसहर र मनाङको चामे जोड्ने सडकखण्ड पुल बगाउँदा पूर्ण रुपमा अवरुद्ध भएको जिल्ला प्रशासन कार्यालय मनाङका प्रमुख सुवासकुमार लामिछानेले जानकारी दिए । ‘खोलाको बहाव घटेको छैन । पुल पनि भत्किएपछि यातायात पूर्ण रुपमा बन्द भएको छ’, उनले भने ।
- ADVERTISEMENT -
खोलाको बहाव नघट्दासम्म बाटो खुल्नेबारे भन्न नसकिने लामिछाने बताए । ‘अहिले वर्षा अलि कम भएको छ । तर पानीको बहाव नघट्दासम्म समस्या नै छ । अहिलेलाई कुनै वैकल्पिक बाटो छैन’, उनले भने, ‘अहिलेलाई यता साधन यतै र उताका साधन उतै रोक्न सूचना पठाइसकेका छौं ।’ पुल भत्किँदा लमजुङसँग मात्र नभई माथिल्लो मनाङको ३ वटा स्थानीय तहसँग सडक सम्पर्क पनि टुटेको प्नशासनको भनाइ छ ।
त्यस्तै तिमाङकै तल्लो क्षेत्रमा पर्ने तिमाङ झरनाले पनि एउटा पक्की पुलमा क्षति पुर्याएको प्रशासनले जनाएको छ । पक्की पुलमा भएको क्षतिबारे एकीन तथ्यांक भने नआइसकेको सीडीओ लामिछानले जानकारी दिए ।
