काठमाडौं / प्रधानमन्त्री तथा मन्त्रिपरिषद् बैठक आज (बिहीबार) बस्ने गरी आह्वान गरिएको छ । बैठक साँझ ५ बजे प्रधानमन्त्री तथा मन्त्रिपरिषद्को कार्यालयमा बस्ने गरी आह्वान गरिएको हो ।
प्रधानमन्त्री केपी शर्मा ओलीको चीन भ्रमणबारे निर्णय गर्न बैठक आह्वान गरिएको हो । सो बैठकमा चीन भ्रमणका एजेण्डाबारेमा पनि छलफल हुने जनाइएको छ ।
प्रधानमन्त्री यही मंसिर १७ गते चीन भ्रमण जाने तयारीमा छन् । उनी ४० सदस्यीय टोलीको नेतृत्व गर्दै चीन भ्रमणमा जाने तयारी गरेका हुन् ।
त्यसअघि भ्रमणको तयारीका लागि आजै दिउँसो परराष्ट्रमन्त्री आरजु राणा देउवा चीन जाँदै छन् । मन्त्री राणाले भोलि शुक्रबार (मंसिर १४) चिनियाँ विदेशमन्त्री वाङ यीसँग छेङ्दुमा भेटवार्ता गर्ने कार्यसूची रहेको छ ।
