काठमाडौँ / नेकपा एमालेनिकट प्रभावशाली जनसंगठन राष्ट्रिय युवा संघ नेपालको नयाँ नेतृत्व चयनका लागि आज (सोमबार) मतदान हुँदैछ । पार्टी नेतृत्वको सर्वसम्मत प्रयास विफल भएपछि अध्यक्ष पदका लागि निवर्तमान अध्यक्ष क्षितिज थेबे र महासचिव सुमन पुरी प्यानलसहित चुनावी मैदानमा उत्रिएका छन् ।
मतदानको समय बिहान ८ बजेदेखि अपराह्न ४ बजेसम्म तोकिएको भए पनि उम्मेदवारको प्रारम्भिक सूची प्रकाशनमा ढिलाइ र दाबीविरोधका प्रक्रिया बाँकी रहेकाले मतदान केही पछि धकेलिने निर्वाचन समितिले जनाएको छ ।
- ADVERTISEMENT -
एमाले अध्यक्ष तथा प्रधानमन्त्री केपी शर्मा ओलीले हालका अध्यक्ष क्षितिज थेबेलाई सर्वसम्मत रूपमा अघि बढाउन निर्देशन दिएका थिए । तर, महासचिव पुरीले अध्यक्षमा आफ्नो दाबी नछोडी चुनावी प्रतिस्पर्धामा जाने अडान लिएपछि अध्यक्ष मण्डलले थेबेलाई सर्वसम्मत बनाउन सकेन ।
नेताहरूले आकांक्षीहरूलाई फकाउने, गलाउने, र दबाब दिने सबैखालका उपाय अपनाए पनि दाबेदारहरू पछि नहटेपछि एमालेका जनसंगठनमध्ये इतिहासमै पहिलोपटक युवा संघमा निर्वाचन हुन लागेको हो । यसले पार्टीको युवा पंक्तिमा नेतृत्व चयन प्रक्रियामा नयाँ अभ्यासको थालनी गरेको छ ।
