काठमाडौं / मनसुनको न्यून चापीय रेखा सरदर स्थानको हाराहारीमा रहँदा देशभर मनसुनी प्रभाव सक्रिय बनेको छ । जल तथा मौसम विज्ञान विभाग, मौसम पूर्वानुमान महाशाखाका अनुसार यसको प्रभावले आज (बुधबार) दिउँसो र राति देशका विभिन्न स्थानमा हल्कादेखि मध्यम वर्षाको सम्भावना रहँदा विशेषगरी तीन प्रदेशमा भारी वर्षा हुनसक्ने देखिएको छ ।
महाशाखाले जारी गरेको पछिल्लो मौसम पूर्वानुमान बुलेटिन अनुसार, हाल कोशी, मधेस र बागमती प्रदेशसहित देशका पहाडी भूभागमा सामान्य बदलीको अवस्था छ भने बाँकी भूभागमा मौसम आंशिक बदली रहेको छ । कोशी, बागमती र गण्डकी प्रदेशका थोरै स्थानका साथै लुम्बिनी, कर्णाली र सुदूरपश्चिम प्रदेशका एक–दुई स्थानमा बिहानैदेखि हल्कादेखि मध्यम वर्षा भइरहेको छ ।
- ADVERTISEMENT -
दिउँसो देशभर मौसम सामान्यतया बदली रहनेछ । महाशाखाका अनुसार कोशी, मधेस, बागमती, गण्डकी प्रदेश तथा अन्य पहाडी भूभागका केही स्थानमा मध्यम वर्षाको सम्भावना छ । बाँकी तराई क्षेत्रका थोरै स्थानमा पनि वर्षा हुनेछ । विशेषगरी, कोशी र गण्डकी प्रदेशका पहाडी भूभागका एक(दुई स्थानमा भारी वर्षाको समेत सम्भावना रहेको छ ।
आज राति कोशी, गण्डकी र लुम्बिनी प्रदेशलगायत देशका पहाडी भूभागमा सामान्य बदली रही अन्य स्थानमा आंशिक बदली रहनेछ । रातिको समयमा कोशी, बागमती, गण्डकी र लुम्बिनी प्रदेशका केही स्थानहरूमा र बाँकी प्रदेशका थोरै स्थानमा हल्कादेखि मध्यम वर्षाको सम्भावना छ । महाशाखाले कोशी, गण्डकी र लुम्बिनी प्रदेशका पहाडी तथा तराई भूभागका एक(दुई स्थानमा भारी वर्षा हुनसक्ने चेतावनी दिएको छ ।
महाशाखाले कोशी, गण्डकी र लुम्बिनी प्रदेशका केही स्थानमा भारी वर्षाको सम्भावना रहेकाले ती क्षेत्रका नदी नाला तथा खहरे खोलामा पानीको बहाव बढ्न सक्ने, भू(क्षय हुन सक्ने, पहिरो जान सक्ने तथा सडक र हवाई यातायातमा समेत सामान्य अवरोध आउन सक्ने भन्दै आवश्यक सतर्कता अपनाउन सबैमा अनुरोध गरेको छ । बदलिँदो मौसमबारे अद्यावधिक जानकारी लिन पनि सर्वसाधारण तथा सरोकारवाला निकायहरूलाई आग्रह गरिएको छ ।
