काठमाडौं / लगातारको वर्षाका कारण धादिङको बेनीघाट रोराङस्थित जवाङखोलामा पहिरो खसेपछि नागढुंगा(मुग्लिन सडकखण्ड अवरुद्ध भएको छ । सडक अवरुद्ध भएपछि काठमाडौंको प्रमुख नाका नागढुंगामा तैनाथ प्रहरीले यात्रुवाहक तथा मालबाहक सवारीका चालक र सहचालकलाई अगाडि नबढ्न र सुरक्षित रहन काठमाडौं फर्कनका लागि माइकिङमार्फत आग्रह गरिरहेको छ ।
आज बिहानैदेखि सडक अवरुद्ध हुँदा सयौं सवारीसाधन तथा यात्रुहरू अलपत्र परेका छन् । जिल्ला प्रहरी कार्यालय, धादिङका अनुसार, बिहान २ बजेतिर बेनीघाट रोराङ(१० स्थित जवाङखोलामा पहिरो खसेर राजमार्ग बन्द भएको थियो । त्यसलगत्तै स्थानीयबासिन्दा, यात्रु र प्रहरीको सक्रियतामा बाटो खुलाइए पनि बिहान करिब ६ बजे पुनः माथिबाट पहिरो खस्दा दुईतर्फी सडक अवरुद्ध भएको प्रहरीले जनाएको छ ।
- ADVERTISEMENT -
प्रहरीले माइकिङ गर्दै चालक तथा सहचालक महानुभावहरूलाई सम्बोधन गर्दै भनेको छ, ‘धादिङको विभिन्न ठाउँमा पहिरो आएको र तत्काल खुलाउन सक्ने अवस्था नरहेको हुँदा सम्पूर्ण चालकरसहचालक महानुभावहरु, तपाईंहरुलाई यहाँबाट पठाउन सकिँदैन । त्यसैले सुरक्षित तरिकाले काठमाडौं फिर्ता भई सुरक्षित रहनुहुन अनुरोध गर्दछौं ।’
धादिङ र तनहुँका अन्य जोखिमयुक्त सडक खण्डमा पनि बिहान ६ बजेबाट गाडी चलाउन रोकिएको जानकारी प्रहरीले दिएको छ । सडक विभाग र सुरक्षाकर्मीको टोली पहिरो हटाउने प्रयासमा जुटेको भएपनि लगातारको वर्षाका कारण काम गर्न कठिनाइ भइरहेको बुझिएको छ । यात्रुहरूलाई वैकल्पिक मार्ग प्रयोग गर्न वा बाटो खुल्ने प्रतीक्षा गर्न अनुरोध गरिएको छ ।
