चितवन / भरतपुर महानगरपालिका वडा नं. २ स्थित रामेश्वर टोल विकास संस्थाले रसुवाको केरुङ–टिमुरे आसपासमा आएको विनाशकारी बाढीबाट भएको ठूलो जनधनको क्षतिप्रति गहिरो दुःख व्यक्त गर्दै विपद् प्रभावितको उद्धार, राहत तथा पुनःस्थापनामा जुट्न अपिल गरेको छ ।
संस्थाका अध्यक्ष लक्ष्मण श्रेष्ठले एक विज्ञप्ति जारी गर्दै भदौ १० गते बिहान करिब ९ बजे नेपाल–चीन सीमा क्षेत्रअन्तर्गत रसुवाको केरुङ–टिमुरे आसपासमा चीनको तिब्बती भूभागबाट आएको बाढीका कारण ठूलो क्षति भएको घटनाप्रति दुःख व्यक्त गरेका हुन् ।
- ADVERTISEMENT -
विज्ञप्तिमा रसुवा, सिन्धुपाल्चोक, नुवाकोट, धादिङलगायतका क्षेत्रमा प्राकृतिक विपत्तिका कारण ज्यान गुमाएका सम्पूर्ण नागरिकप्रति श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरिएको छ । साथै, बाढी तथा विपद्मा परी घाइते भएका सम्पूर्ण नागरिकको शीघ्र स्वास्थ्यलाभको कामना गरिएको छ ।
अध्यक्ष श्रेष्ठले विपद्मा परी घाइते भएकाहरूको उपचारमा तत्काल तदारुकता देखाउन तथा बेपत्ता नागरिकको खोजी र उद्धार कार्यलाई तीव्र बनाउन सम्बन्धित निकायसँग आग्रह समेत गरे ।
- ADVERTISEMENT -
त्यस्तै, प्रभावित क्षेत्रमा तत्काल उद्धार, राहत संकलन, राहत वितरण तथा पुनःस्थापनाका कार्यलाई प्रभावकारी र समन्वयात्मक रूपमा अघि बढाउन संस्थाका सदस्यहरू तथा भरतपुर–२, क्षेत्रपुर क्षेत्रमा बसोबास गर्ने व्यवसायी, घरधनी तथा शुभचिन्तकहरूलाई सहयोगमा जुट्न आग्रह गरिएको छ ।
विपद्को कठिन र दुःखद् घडीमा प्रभावित नागरिक तथा समुदायको सहयोगका लागि सम्पूर्ण संघ–संस्था, सामाजिक अभियन्ता, व्यवसायी, नागरिक समाज तथा सम्बन्धित सरोकारवाला निकायहरूलाई आ–आफ्नो क्षेत्रबाट सहयोग गर्न संस्थाले अपिल गरेको छ ।
“विपद्को यस घडीमा सबै एकजुट भई मानवीय भावना, सहयोग, संयम र सहकार्यका साथ प्रभावित नागरिकको जीवन रक्षा तथा पुनःस्थापनामा योगदान पुर्याऔँ,” विज्ञप्तिमा उल्लेख छ ।
रामेश्वर टोल विकास संस्था, भरतपुर–२, क्षेत्रपुरले विपद् प्रभावित नागरिकको उद्धार, राहत तथा पुनःस्थापनाका लागि आवश्यक सहयोग र सहकार्यमा सबैलाई सक्रिय हुन आग्रह गर्दै बाढीमा ज्यान गुमाएकाहरुको सम्झनामा दिप प्रज्वलन गरिएको थियो ।
