काठमाडौं / भारतस्थित श्रीनगरको नौगाम प्रहरी चौकीभित्र भएको विस्फोटमा नौ जनाको मृत्यु भएको पुष्टि भएको छ । जम्मू कश्मीरका प्रहरी महानिर्देशक (डीजीपी) नलिन प्रभातले विस्फोटमा नौ जनाको मृत्यु भएको र २७ प्रहरीसहित जम्मा ३२ जना घाइते भएको बताए ।
पत्रकार सम्मेलनमा उनले एफएसएल टोलीले नमुना लिने प्रक्रिया धेरै सावधानीपूर्वक गरेको भए तापनि दुर्भाग्यवश राति लगभग ११।२० बजे दुर्घटना भएको बताए । बीबीसीका अनुसार उनले यस घटनाको बारेमा अन्य कुनै पनि प्रकारको अनुमान लगाउनु बेकार भएको बताए ।
- ADVERTISEMENT -
डीजीपीले भने, ‘यस दुर्भाग्यपूर्ण घटनामा नौ जनाको मृत्यु भएको छ । यसमा तीन जना एफएसएल टोलीका कर्मचारी, दुई जना राजस्व अधिकारी र अन्य कर्मचारीहरू समावेश छन् । यसबाहेक २७ जना प्रहरी, दुई जना राजस्व अधिकारी र तीन जना सर्वसाधारण घाइते छन् ।’
घाइतेहरूको नजिकैको अस्पतालमा लगेर उपचार भइरहेको छ । उनले भने, ‘प्रहरी चौकीको भवनमा ठूलो क्षति पुगेको छ । यसबाहेक छेउका भवनहरूमा पनि क्षति पुगेको छ । यो घटनाको पछाडिको कारणहरूको अनुसन्धान भइरहेको छ ।’
- ADVERTISEMENT -
यसअघि समाचार एजेन्सी पीटीआईले अधिकारीहरूलाई उद्धृत गर्दै ह्वाइट–कलर आतंक मोड्युल केससँग सम्बन्धित विस्फोटक पदार्थहरूबाट नमुनाहरू लिइँदै गर्दा विस्फोट भएको उल्लेख गरेको थियो । यो विस्फोटक हरियाणाको फरीदाबादबाट ल्याइएको थियो ।
