भरतपुर / नेपाल आदिवासी जनजाति महासंघ (नेफिन) जिल्ला समन्वय परिषद् चितवनले ३२औँ विश्व आदिवासी दिवस विशेष कार्यक्रमका साथ मनाउने भएको छ ।
आइतबार महासंघको आफ्नै भवनमा बसेको बैठकले विश्व आदिवासी दिवसको तयारी तथा कार्यक्रम व्यवस्थापनसम्बन्धी विभिन्न निर्णय गरेको नेफिन चितवनका अध्यक्ष सागर कुमालले जानकारी दिए ।
- ADVERTISEMENT -
उनका अनुसार साउन २४ गते भरतपुरस्थित वीपी कोइराला मेमोरियल क्यान्सर अस्पतालको सभाहलमा कार्यक्रम आयोजना गरिनेछ । कार्यक्रमको उद्घाटन भरतपुर महानगरपालिकाका कार्यवाहक मेयर चित्रसेन अधिकारीले गर्ने तय भएको छ ।
कार्यक्रममा सहभागी हुने सम्पूर्ण आदिवासी जनजाति समुदायका सदस्य, जातीय संस्था तथा प्रतिनिधिहरूलाई आफ्नो जातीय पहिचान, धर्म र संस्कृतिलाई झल्काउने मौलिक पोशाक लगाएर उपस्थित हुन आग्रह गरिएको छ ।
महासंघले जिल्लामा क्रियाशील सबै आदिवासी जनजातिका जातीय संस्था, प्रतिनिधि तथा समुदायका सदस्यलाई कार्यक्रम सफल बनाउन सक्रिय सहभागिताका लागि आह्वान समेत गरेको छ ।
नेफिनले विश्व आदिवासी दिवस आदिवासी जनजातिको पहिचान, भाषा, धर्म, संस्कृति तथा मौलिक अधिकारप्रति जनचेतना अभिवृद्धि गर्ने उद्देश्यका साथ हरेक वर्ष मनाइँदै आएको छ । यस वर्ष पनि दिवसका अवसरमा विविध सांस्कृतिक प्रस्तुति, परम्परागत झाँकी तथा समुदायबीच एकता र सहकार्यको सन्देश प्रवाह गर्ने कार्यक्रम समावेश गरिने तयारी गरिएको महासंघले जनाएको छ ।
