भरतपुर / नेपाल आदिवासी जनजाति महासंघ (नेफिन) चितवनले ३२औँ विश्व आदिवासी दिवस भोलि (आइतबार) विभिन्न सांस्कृतिक कार्यक्रम तथा छलफलसहित मनाउने भएको छ ।
भरतपुरस्थित बिपी कोइराला मेमोरियल क्यान्सर अस्पतालको सभाहलमा आयोजना हुने कार्यक्रमको तयारी अन्तिम चरणमा पुगेको नेफिन चितवनका अध्यक्ष सागर कुमालले जानकारी दिए ।
- ADVERTISEMENT -
उनका अनुसार कार्यक्रममा नेफिन चितवनअन्तर्गत रहेका १६ वटा घटक संस्थाका प्रतिनिधिको सहभागिता रहनेछ । कार्यक्रममा भरतपुर महानगरपालिकाका कार्यवाहक मेयर चित्रसेन अधिकारी प्रमुख अतिथिका रूपमा सहभागी हुनेछन् ।
हरेक वर्ष अगस्ट ९ तारिखलाई विश्वभरका आदिवासी जनजातिले विश्व आदिवासी दिवसका रूपमा मनाउँदै आएका छन् । आदिवासी जनजातिको अधिकार, पहिचान र समानताका विषयमा आवाज उठाउने तथा राज्यलाई आफ्ना हकअधिकार सुनिश्चित गर्न दबाब दिने अवसरका रूपमा समेत यो दिवस मनाउने गरिएको छ ।
नेफिन चितवनका अनुसार कार्यक्रममा सांस्कृतिक प्रस्तुतिसँगै चितवनका आदिवासी जनजाति समुदायले भोग्दै आएका समस्या र तिनको समाधानका उपायबारे छलफल तथा बहस हुनेछ ।
विशेषगरी चितवन राष्ट्रिय निकुञ्ज तथा मध्यवर्ती क्षेत्रबाट प्रभावित आदिवासी जनजाति समुदायका समस्या, उनीहरूको अधिकार र संरक्षणका नाममा समुदायमाथि परेको प्रभावका विषयमा समेत कार्यक्रममा छलफल गरिने जनाइएको छ ।
यसैबीच, नेफिनको संघीय समितिले काठमाडौंको खुलामञ्चमा विशाल कार्यक्रम आयोजना गरी विश्व आदिवासी दिवस मनाउने तयारी गरेको छ । संघीय समितिको परिपत्रअनुसार देशभरका जिल्ला शाखाहरूले पनि विभिन्न कार्यक्रम आयोजना गर्न लागेका हुन् ।
