झाडीमा भेटिएकी ‘मानवी’को नगरप्रमुखद्वारा अभिभावकत्व ग्रहण

काभ्रे / सात महिनाअघि झाडीमा भेटिएकी बालिका ‘मानवी’को नमोबुद्ध नगरपालिका काभ्रेका प्रमुख टिपी शर्मा तिमल्सिनाले अभिभावकत्व ग्रहण गरेका छन् । प्रमुख तिमल्सिनाले मानवीको अभिभावकत्वसँगै शनिबार अन्नप्रासनसमेत सम्पन्न गरेका हुन् ।
मानवीको धुलिखलस्थित मानव कल्याण समाज सेवा घरमा अन्नप्रासन गरिएको हो । सिन्धुपाल्चोकको एउटा झाडीमा फालिएको अवस्थामा स्थानीय शिक्षकहरुले मानवीलाई भेटेका थिए ।
मानसिक अवस्था कमजोर भएकी आमाबाट जन्मिएकी उनलाई जन्मेको १७ औं दिनमा उद्धार गरिएको थियो । उद्धार गर्दा अत्यन्तै नाजुक अवस्थामा रहेकी उनको स्वास्थ्य अहिले पूर्णरुपमा ठीक भइसकेको छ । हाल उनमा कुनै पनि किसिमको स्वास्थ्य समस्या देखिएको छैन ।
मानव कल्याण समाजले उद्धार गरेपछि उनको २५ औं दिनमा न्वारान गरिएको मानव कल्याण समाजकी अध्यक्ष सुमित्रा चौलागाईंले बताइन् । ती बालिकाको समाजले नै मानवीको रुपमा नामाकरण गरिदिएको हो । यसअघि तीनजना बालिकाको अन्नप्रासन मानव कल्याण समाजमा भइसकेको छ ।
नमोबुद्ध नगरका नगरप्रमुख टिपी शर्मा तिमल्सिनाले यसअघि ६ जना बालबालिकाको शिक्षादीक्षाका लागि अभिभावकत्व ग्रहण गरिसकेका छन् । उनले ती बालबालिकालाई आफ्नो जन्मदिनको अवसर पारेर शिक्षा खर्च उपलव्ध गराउने गरेका छन् ।
आफूले सातौं नातिनीको रुपमा मानवीको अभिभावकत्व ग्रहण गरेको तिमल्सिनाले बताए । सडक मानवमुक्त नेपाल बनाउने मानव कल्याण समाजको अभियानमा आफू र नगरपालिका पनि जोडिएको भन्दै उनले मानवीको शिक्षादीक्षा लगायतका कुरामा आगामी दिनमा सहयोग गर्ने बताए ।
मानवीको अन्नप्रासनका लागि नगर प्रमुख तिमल्सिना श्रीमति सरस्वती तिमल्सिनासहित उपस्थित भएका थिए । तिमल्सिना दम्पतीले मानवीको मामाघरको हजुरबुबा÷हजुरआमाको रुपमा अभिभावकत्व ग्रहण गरेका छन् । नगर प्रमुख तिमल्सिनाले समाजका लागि सेवा घर निर्माण गर्न नमोबुद्ध नगरपालिकाभित्र आवश्यक जग्गा उपलव्ध गराउने घोषणासमेत गरेका छन् । आगामी बर्षदेखि आफ्नो जन्मदिनसमेत सेवा घरमा रहेकाहरुको सेवा गरेर मनाउने पनि तिमल्सिनाले बताए ।