चितवनमा ५६ कुष्ठरोगका नयाँ संक्रमितहरु

–पूजा ढकाल
चितवन । चितवनमा ५६ जना कुष्ठरोगका नयाँ संक्रमितहरु भेटिएका छन् । ‘द लेप्रसि मिसन नेपालले आयोजना गरेको ३८औं विश्व कुष्ठरोग दिवस कार्यक्रममा ५६ जना कुष्ठरोगका नयाँ संक्रमितहरु भेटिएको बताइएको हो ।
स्वास्थ्य कार्यालय चितवनका प्रमुख दिपकप्रसाद तिवारीले कुष्ठरोग आँखाले देख्न नसकिने सुक्ष्म माइक्रो व्याक्टेरियम लेप्रे नामको किटाणुबाट लाग्ने गरेको पाइएको बताए ।
उनका अनुसार जिल्लामा प्रति दस हजार मध्ये एक जनाभन्दा कम व्यक्तिमा यो कुष्ठरोग संक्रमण देखिएको छ । हाल जिल्लामा १ सय १६ जना यो रोगका संक्रमितहरु रहेको उनको भनाइ थियो । उनले ३ बर्षसम्म यसको लगातार मापन गरिएको पनि जानकारी गराए ।
चालु आर्थिक बर्ष २०७५–२०७६ का अनुसार हाल चितवनमा ५६ जना कुष्ठरोगका नयाँ बिरामीहरु भेटिएका छन् । यो रोग दुई प्रकारको हुन्छ जुन पि.बि. र म.बि. हो । उक्त रोग मानिसको छाला र स्नायुमा लाग्ने कम सरुवा र दीर्घरोग मानिने यो रोग उपचारका माध्यमबाट निर्मुल पार्न सकिन्छ ।
उनले यो संख्या चालू आर्थिक बर्ष २०७५–७६ मा प्रति १० हजारमा ०.९५५ र २०७४–७५ मा १.२१५ रहेको बताए । नेपाल सरकारद्वारा यो रोगको निःशुल्क उपचार गरिने भएकाले रोग नलुकाउन स्वास्थ्य कार्यालय चितवनले सबैलाई आग्रह पनि गरेको छ ।
चालू आर्थिक वर्षका नयाँ ५६ जना संक्रमित मध्ये भरतपुर महानगरपालिकाका २९, रत्नगर नगरपालिकाका २०, कालिका नगरपालिकाका १, खैरहनी नगरपालिकाका ९ त्यस्तै राप्ती र माडी नगरपालिकाका ५–५ जना रहेको ‘द लेप्रसि मिसन नेपाल’की जिल्ला संयोजक सुशीला श्रेष्ठले बताइन् ।
विशेषतः यो रोग २–५ बर्ष उमेर समुहका बालबालिका र ३० बर्षभन्दा माथिका मानिसलाई लाग्ने सम्भावना रहेको पाइन्छ । यो मानिसमा लाग्ने रोग हो जसको लक्षण सामान्य तया छुँदा थाहा नपाउने रातो फुस्रो दाग देखिने, हात खुट्टा झमझमाउने छाला चम्किने र बाक्लो हुने, बाहिरी भाग सुनिने आदि हुन् ।
मुख्यतया यो रोगले हात खुट्टा र आँखामा असर गर्ने गरेको पाइन्छ । यो मानिसमा मात्र लाग्ने रोग हो जसको १ डोज औषधी सेवनले पनि ९९.९७५ व्याक्टेरिया निष्कृय हुने र एक व्यक्तिबाट अर्को व्यक्तिमा नसर्ने कुरा श्रेष्ठले भनिन् ।