दाउन्नेमा ट्रक दुर्घटना : तीन जना गम्भीर घाइते

नवलपुर / दाउन्नेको डाँडाबाट ट्रक खस्दा तीन जना गम्भीर घाइते भएका छन् । पूर्वपश्चिम राजमार्गबाट पूर्वतर्फ जाँदै गरेको भारतीय ट्रक आइतबार राति नवलपरासी (बर्दघाट–सुस्तापूर्व)को विनयी त्रिवेणी गाउँपालिका–२ को सडकबाट करिब १५० मिटर तल खस्दा दुर्घटना भएको प्रहरीले जनाएको छ ।
यूके१७ सीए २०८१ नम्बरको केरा बोकेको भारतीय ट्रक आफै अनियन्त्रित भएर राजमार्गबाट तल खस्दा तीन जना गम्भीर घाइते भएका जिल्ला प्रहरी कार्यालयका प्रवक्ता प्रहरी नायब उपरीक्षक दिलीपकुमार गिरीले जानकारी दिनुभयो । दुर्घटनाको खबर पाउनासाथ इलाका प्रहरी कार्यालय दुम्किबासबाट प्रहरी निरीक्षक हिक्मतबहादुर थापाको नेतृत्वमा खटिएको प्रहरी टोलीले घाइतेको उचार गरी चितवनको भरतपुरस्थित पुरानो मेडिकल कलेजमा उपचारका लागि पठाइएको गिरीले बताउनुभयो ।
दुर्घटनामा परी भारतको हैदरावाद जिल्ला सिद्रापुर घर भएका चालक ३२ वर्षीय ईरसाद मुल्लिम, सहचालक उत्तर प्रदेश घर भएका २७ वर्षीय कल्लु खान र भारतको सुनौली नगरपालिका–१३ जुगौली महाराजगञ्ज घर भएका ३८ वर्षीय अब्दुल समदको शरिरका विभिन्न स्थानमा चोट लागेको र उनीहरुको अवस्था गम्भीर रहेको प्रहरीले जनाएको छ ।